Օրեր առաջ Երևանում անակնկալ կերպով հայտնվեց երկրորդ 3D նկարը՝ ԵՃՇՊՀ-ի ետնաբակերից մեկում: Հեղինակները հենց այդ համալսարանի «Համակարգչային դիզայն» բաժնում սովորող ուսանողներն են: Նրանցից մեկի՝ Լաուրա Նազինյանի հետ զրույցում, իմացանք, որ 3D նկարն իրականացնելու համար փորձեր էր կատարվում դեռ մեկ տարի առաջվանից, սակայն ինչ-ինչ պատճառներից ու խնդիրներից ելնելով՝ այն հաջողվեց նկարել վերջերս միայն: «Այս ամենին հասանք մեր նոր խմբի շնորհիվ, որում բացի ինձնից՝ ընդգրկված էին Տարոն Բադալյանը, Մերի Թոքմաջյանը, Դիանա Ստեփանյանը, Սաթի Վարդանյանը, իսկ խմբի ղեկավարը Դավիթ Փարվանյանն է»: Թեև առաջին իսկ հանդիպման ժամանակ բուռն և հագեցած քննարկում է սկսվել, սակայն ինչպես նշում է Լաուրան՝ անհամաձայնություններ ընդհանրապես չեն եղել. «Կարճ ժամանակ անց ամեն մեկս հասկացանք մեր անելիքը և հետո, բացի աշխատանքից, մենք կապված են նաև ամուր ընկերական կապերով», – ասում է նա: Էսքիզն էլ որոշել էին անել պարզ ու հասարակ մի նկար՝ կապված նկարչության, արվեստանոցի հետ, որի բակում էլ հենց նկարել են: 3D նկարն իրականացնելը ուսանողներից խլել է 4 օր, ինչպես նշում է Լաուրան՝ պատճառը եղանակն էր` կեսօրին շատ շոգ էր, իսկ երեկոյան՝ անձրև: Այն, որ նկարը մեծ արձագանք կունենա՝ ոչ ոք չէր սպասում, բայց դրական գնահատականներն ու խոսքերը ոգեշնչել են ուսանողներին: «Ստացել ենք նաև նոր առաջարկներ, որոնք մենք կընդունենք ու մեծ սիրով կգեղեցկացնենք մեր սիրելի քաղաքը», – նշում է Լաուրան:
Տիգրանուհի Թասլակյան
