Սիրիահայ գրող Տիգրան Գաբոյանը երեք ամիս է Հայաստանում է: Այսօր էլ «Հայելի» ակումբում խոսում էր Սիրիայում ընթացող վերջին դեպքերի ու հայ համայնքի վրա դրա ազդեցության մասին: Ինքն ամեն օր կապի մեջ է եւ ասում է, որ այնտեղ ոչ-մի խուճապ չկա. «Մինչեւ հիմա զոհվել է վեց հայ: Իմ իմանալով, երկու-երեք հոգին զինծառայողներն են եղել, իսկ մնացածը` քաղաքացիներ: Համայնքը միշտ օրինականությանն ու ապահովությանն է ձգտել: Այն ամենակազմակերպվածն է ամբողջ աշխարհում: Հուսով եմ` այս դեպքերը չեն քայքայի մեզ»:
Որքանով տեղյակ է Գաբոյանը, Սիրիայից Հայաստան ժամանածների հիմնական մասը բնակվում է վարձով: Չնայած դրան, եթե ընտրելու լինեն Հայաստան, թե Սիրիա, ապա, բանախոսի պնդմամբ, նրանց առաջին նախապատվությունը կլինի Հայաստանը: Նա նաեւ նկատել է` շատացել է այստեղ վերադառնալու միտումը:
Իր խոսքով, ՀՀ. Սփյուռքի նախարարությունը մշակում է վերաբնակեցման ծրագիր, իսկ կառավարությունը նույնպես ինչ-որ մի բան անում է, իսկ թե ինչ` սիրիահայը չկոնկրետացրեց:
Տիգրան Գաբոյանը վախ չունի, թե ով կգա իշխանության. «Ոչ իսլամիստները, ոչ մյուսները, կարծում եմ, համայնքին չեն սպառնա»:
Կարդացեք նաև
Բանախոսը առաջարկեց` հեշտացնել վիզայի ստացումն ու ավելացնել չվերթները, ավիաընկերություններից մեկին էլ խնդրել են` իջեցնել ավիատոմսի գինը, իսկ կառավարությանն էլ կոչ է անում` լուծել գաղթական սիրիացիների կացության հարցը: «Այս առաջարկներին դեռ կոնկրետ պատասխան չենք ստացել, սակայն ամեն ինչ նույնը մնալու միտում ունի»,- ասում է սիրիահայը:
Արամ ԱՐԱՐԱՏՅԱՆ
