Այս տարվա ընդունելության քննությունների ընթացքում Խաչատուր Աբովյանի անվան պետական մանկավարժական համալսարանի ուսանող է դարձել 1532 դիմորդ: Մրցույթը բարձր է եղել հայոց լեզու եւ գրականություն, մանկավարժություն եւ մեթոդիկա մասնագիտությունների գծով: Այս մասին «Երկու երես» մամուլի ակումբում այսօր հայտնեց մանկավարժական համալսարանի պրոռեկտոր Մհեր Մելիք-Բախշյանը. «Կենսաբանության, աշխարհագրության եւ մաթեմատիկայի ֆակուլտետներում թափուր տեղեր չեն մնացել: Փոխարենը՝ քիմիայի ֆակուլտետ ընդունելության հայտ է ներկայացրել ընդամենը 11 դիմորդ»:
Պարոն Մելիք-Բախշյանը տեղեկացրեց, որ նոր մասնագիտության՝ հագուստի մոդելավորման գծով հայտ է ներկայացրել 15 դիմորդ, ինչը գոհացուցիչ արդյունք է. «Միանշանակ, նախընտրելի է ընդունելության ոչ թե քանակը, այլ որակը: Դիմորդի համար ընդունելությունը պետք է հեշտ լինի, իսկ ավարտելը՝ դժվար, որպեսզի շրջանավարտը կարողանա տիրապետել անհրաժեշտ հմտություններին»: Ռեկտորի խոսքով՝ առավել ակտուալ են բուհի հատուկ կրթական գծով մասնագիտությունները՝ սուրդոմանկավարժություն, տիֆլոմանկավարժություն, մանկավարժություն եւ հոգեբանություն:
Լուիզա ՍՈՒՔԻԱՍՅԱՆ
