Հայաստանի պետական ճարտարագիտական համալսարանն (ՀՊՃՀ) այս տարվա ընդունելության քննությունների համար առաջադրել էր 1286 տեղ, որից 243-ը՝ պետպատվերով: Վճարովի հիմունքներով բուհ է ընդունվել 1170 դիմորդ: Այս մասին «Հայացք» ակումբում այսօր հայտնեց Հայաստանի պետական ճարտարագիտական համալսարանի ռեկտոր Արա Ավետիսյանը: Նա նշեց, ոչ մինչ ընդունելության քննությունների մեկնարկը՝ մի քանի ամիս շարունակ նախկին շրջկենտրոնների ավարտական դասարաններ ունեցող բոլոր դպրոցների աշակերտների հետ բուհն անցկացրել է տեղեկատվական եւ խորհրդատվական հանդիպումներ. «Բաժանվել են բուկլետներ՝ համալսարանի մասնագիտությունների եւ լաբորատորիաների վերաբերյալ, բացի այդ՝ պատրաստել ենք մոտ կես ժամ տեւողությամբ հոլովակ, որի միջոցով կարելի է ծանոթանալ ուսման պայմաններին»:
Ռեկտորի տեղեկացմամբ՝ ճարտարագիտական համալսարանն այս տարի ընդունելություն էր կազմակերպել տեղեկատվական ոլորտի երեք նոր մասնագիտությունների գծով. «Ավանդաբար մրցույթը բարձր էր մաթեմատիկայի եւ ինֆորմատիկայի գծով: Դիմորդների ամենաքիչ քանակությունը գրանցվել է լեռնաարդյունաբերություն եւ նյութագիտություն ֆակուլտետներում»:
Լուիզա ՍՈՒՔԻԱՍՅԱՆ
