«Պահանջում ենք պատժել «Հարսնաքարում» տեղի ունեցածի բոլոր մեղավորներին» նախաձեռնության անդամ Արթուր Մինասյանը վստահ է, որ «Հարսնաքարի» գործը իրավապահների կողմից կոծկվում է, իսկ վերլուծաբան Էդիկ Անդրեասյանը նման պնդման համար հավատարժան հիմքեր չի տեսնում:
«Առավոտ»– Ո՞րն էր «Հարսնաքարի» հարցով ԱԺ արտահերթ նստաշրջան հրավիրելու ստորագրահավաքը հենց այս փուլում նախաձեռնելու նպատակը՝ հաշվի առնելով այն, որ ամենամեծաթիվ ոչ կոալիցիոն խմբակցության քարտուղարը կանխավ հայտարարել էր, որ ԲՀԿ անդամների գերակշիռ մասը Հայաստանում չէ:
Էդիկ Անդրեասյան- Ես ուզում եմ նշել, որ ստորագրահավաքը ձախողվեց այս փուլում, սակայն վստահ եմ, որ գործընթացը կշարունակվի ապագայում, երբ արդեն պատգամավորները այստեղ կլինեն: Ինչ վերաբերում է այս փուլին, ապա այստեղ մենք նկատեցինք ակնհայտ շտապողականություն, որովհետեւ եթե արտահերթ նիստ հրավիրելու մասով քաղաքական ուժերի, այդ թվում՝ ԲՀԿ-ի հետ քննարկումներ գնացել էին, ապա ժամկետների մասով կարծես թե հստակ պայմանավորվածություններ դեռ չէին եղել: Թե ինչու ՀԱԿ-ը գնաց անպայման այս փուլում ստորագրահավաք սկսելու ճանապարհով, դատելով նաեւ այդ թեմայով ընդդիմադիր կուսակցությունների հետագա փոխհրաձգությունից՝ ես ենթադրում եմ, որ ՀԱԿ-ն, այնուամենայնիվ, ինչ-որ առաջնայնություն ձեռք բերելու միտում է ունեցել:
Կարդացեք նաև
Արթուր Մինասյան– Եթե համեմատենք նախորդ գումարման ԱԺ-ի հետ, ապա մենք պետք է փաստենք, որ աննախադեպ իրավիճակում ենք, երբ քաղաքացիական հանրության ճնշմանը եւ պահանջին արձագանքում են ԱԺ 4 խմբակցություններ, որոնց ստորագրահավաքին մասնակցած պատգամավորներն ըստ էության հակադրվեցին քաղաքական իշխանությանը՝ ի դեմս ՀՀԿ-ի եւ ՕԵԿ-ի, եւ սա շատ լավ նախադեպ է: Մյուս կողմից՝ մտահոգիչ էր, որ, մեղմ ասած, բավարար քաղաքական կամք չդրսեւորվեց պատգամավորների կողմից, եւ 44 ստորագրություն չհավաքվեց, երբ դրա հնարավորությունը կար: Ճիշտն ասած, այդ տեխնիկական պատճառաբանությունները համոզիչ չեն, այնուամենայնիվ, պետք է փաստել, որ այդ 21 ստորագրությունները ներկայացնում են 4 տարբեր խմբակցություններ, ինչը իրոք նորություն է մեր քաղաքական դաշտում:
Ինչ վերաբերում է նախաձեռնության շտապողականությանը, ապա նախաձեռնող խումբը եւս մեկ պահանջ էր մտցրել օրակարգ՝ կապված գործով ԱԺ ժամանակավոր հանձնաժողովի ստեղծման հետ: Եվ այդ մասով էլ ստորագրահավաքը ժամանակից շուտ չէր, քանի որ քրեական գործը քննության փուլում է, եւ գուցե մեկ-երկու ամիս հետո արդեն ուշ լինի խորհրդարանական նման հանձնաժողովի վերահսկողության արդյունավետության համար: Որովհետեւ մենք այսօր իսկ տեսնում ենք, որ քրեական գործը քննության ընթացքում ակնհայտորեն կոծկվում է: Եվ հետեւաբար՝ ժամանակավրեպության հարց չկա:
Է. Անդրեասյան– Որտեղի՞ց Ձեզ այն տեղեկատվությունը, որ գործը կոծկվում է: Դուք դա ենթադրո՞ւմ եք, թե՞ վստահ եք:
Ա. Մինասյան– Ես վստահ եմ, որ գործը կոծկվում է, քանի որ կան դրա որոշակի ցուցիչներ: Տուժող կողմը հայտարարել է, որ իրենց առնվազն 15 հոգի են ծեծել, սակայն մինչ օրս կալանավորված են, չգիտես ինչու, 6 հոգի: Բացի դրանից՝ փոխոստիկանապետը զբաղված է Ռուբեն Հայրապետյանի անընդհատ քարոզով եւ պաշտպանությամբ: Իսկ քննչական մարմինները՝ հղում անելով նախաքննական գաղտնիքին, լրատվամիջոցներին տեղեկատվություն չեն տրամադրում: Նաեւ ոստիկանության վերջին ասուլիսի ժամանակ տարօրինակ եւ զարմանալի հայտարարություններ եղան. պարզվեց, որ այդ օրը Ռուբեն Հայրապետյանի ողջ մարշրուտի երկայնքով տեսախցիկները փչացել են. ֆուտբոլի ֆեդերացիայում դրանք չեն աշխատել, չեն աշխատել «Հարսնաքարում», ջնջվել են միջադեպից 3 օր առաջվանից արված այդ ամբողջ տեսագրությունները եւ այլն: Դրան գումարած՝ իշխանական քաղաքական գործիչների պնդումները, որ Հայրապետյանն այնտեղ չի եղել:
Է. Անդրեասյան- Տուժողներն է՞լ են պնդում, որ Հայրապետյանն այնտեղ է եղել:
Ա. Մինասյան– Ես տուժողների հետ անձամբ շատ քիչ եմ շփվել, չեմ կարող ասել:
Է. Անդրեասյան– Ես, իհարկե, իմ հարցի պատասխանը չստացա, որովհետեւ այն պատճառաբանությունները, որ Դուք ներկայացնում եք եւ դրանից անում Ձեր եզրակացությունները, մի քիչ համոզիչ չեն, որովհետեւ որեւէ երկիր, որեւէ պետություն, իշխանություն այդքան գռեհիկ կերպով հետքերը չէր թաքցնի: Դա ընդամենը մանկական բաներ են:
Ա. Մինասյան- Բայց Դուք ինչո՞ւ եք զարմանում, մենք դրա ավելի վատ նախադեպերը ունենք. Հոկտեմբերի 27, Լեւոն Գուլյանի սպանություն, Մարտի 1…
Է. ԱնդրԵասյան– Դա ձեր կարծիքն է, բայց ես հիմա նրանց չեմ պաշտպանում: Վերադառնալով ստորագրահավաքին՝ ուզում եմ ասել, որ եթե մեր ընդդիմադիր կուսակցությունները հարցը մի փոքր այլ կերպ դնեին՝ ավելի գլոբալ, եթե ընդհանուր ամենաթողության երեւույթը վերցնեին իր էության մեջ, ես չեմ կարծում, թե խնդիր լիներ 44 ստորագրություն հավաքելը: Ավելին, այդ ժամանակ ես կարծում եմ, որ կմասնակցեին անգամ իշխանական պատգամավորները:
Ա. Մինասյան– Եթե լոկալ եւ շատ կոնկրետ հարցի շուրջ ստորագրությունները չեն հավաքվում, ուր մնաց թե՝ գլոբալի շուրջ հավաքվեն: Բայց այստեղ ես մի բան չեմ հասկանում. Ռուբեն Հայրապետյանը հայտարարեց մանդատը վայր դնելու որոշման մասին, ինչո՞ւ հանրապետականները չեն աջակցում իրենց կուսակից ընկերոջը՝ Ռուբեն Հայրապետյանին, որպեսզի նա հնարավորինս շուտ ի կատար ածի իր ցանկությունը՝ այն հնչեցնելով ԱԺ-ում:
«Առավոտ»– Դուք կարծում եք, որ Հայրապետյանը սեպտեմբերին կարող է ե՞տ կանգնել մանդատը վայր դնելու որոշումից:
Ա. Մինասյան- Ես դա ոչ միայն չեմ բացառում, այլեւ մենք դրա բազմաթիվ օրինակներն ունենք. Սերժ Սարգսյանը Հոկտեմբերի 27-ից հետո հրաժարական տվեց, սակայն դրանից հետո նշանակվեց ավելի բարձր պաշտոնի, նույնը՝ Գագիկ Բեգլարյանի դեպքում:
Է. Անդրեասյան– Ես չեմ կրկնի Արտաշես Գեղամյանի խոսքերը, թե Ռուբեն Հայրապետյանը շատ բարձր տղա է, բայց կարծում եմ, որ նա մանդատը վայր դնելու որոշումը չի փոխի:
Բանավեճը վարեց ԱՐԵՎԻԿ ՍԱՀԱԿՅԱՆԸ
Նախագիծն իրականացվում է «Բաց հասարակության հիմնադրամներ-Հայաստան» ծրագրի շրջանակներում:
«Դեմ առ դեմ» բանավեճն ամբողջությամբ
