«Բարգավաճ Հայաստան» խմբակցության քարտուղար Նաիրա Զոհրաբյանը հենց նոր Aravot.am-ին տեղեկացրեց, որ ԲՀԿ-ն որոշել է Գյումրու քաղաքապետի պաշտոնի համար առաջադրել ԱԺ պատգամավոր Սամվել Բալասանյանի թեկնածությունը: «Ես առավոտյան ձեզ ասել էի, որ մենք հարցումներ ենք անցկացնում Գյումրիում` պարզելու, թե մեր թեկնածուներից ով է ավելի շատ վստահություն վայելում գյումրեցիների շրջանակում: Բացառապես հիմնվելով հարցումների արդյունքների վրա` ԲՀԿ-ն քաղաքական որոշում է կայացրել սեպտեմբերի 9-ին կայանալիք ՏԻՄ ընտրություններում Գյումրու քաղաքապետի պաշտոնի համար առաջադրել Սամվել Բալասանյանի թեկնածությունը», -ասաց տիկին Զոհրաբյանը:
Նշենք, որ չնայած տարբեր լուրեր են շրջանառվում այն մասին, որ ՀՀԿ-ական վերնախավը արգելելու է Գյումրու գործող քաղաքապետ Վարդան Ղուկասյանին այս անգամ ևս առաջադրել իր թեկնածությունը, նա երեկ հանդիպել է հ/կ ներկայացուցիչների հետ ու հայտարարել. «Ժողովուրդն ինձ պարտադրում է, կոկորդս բռնել է ու ասում է, որ պիտի առաջադրես քո թեկնածությունը»:
Նունե ԱՐԵՎՇԱՏՅԱՆ
