Բանակում խաղաղ պայմաններում մահացած զինծառայողների հարազատները դեռ Կառավարության շենքում են: Նրանք շարունակում են գոռալ ու ներքեւ կանչել կառավարության անդամներին: Իսկ կառավարության նիստը սկսվել է ու սովորականի պես ընթանում է: Ոստիկաններն այլեւս նրանց դուրս հրավիրելու քայլեր չեն ձեռնարկում, լուռ լսում են նրանց բողոքը: Նրանց բողոքը լսելու է իջել նաեւ կառավարության աշխատակազմում քաղաքացիների ընդունելության և դիմումների քննարկման վարչության պետ Ալեքսանդր Ղազարյանը: Բայց ցուցարարները չեն զիջում եւ պնդում են, որ մինչեւ վարչապետին չտեսնեն՝ չեն հեռանա:
«Թող վարչապետը դուրս գա ու պատասխանի մեր բանակում՝ ինչ է կատարվում: Գնում ենք նախագահականի մոտ ենք կանգնում՝ նախագահը դուրս չի գալիս, ոստիկաններն էլ թույլ չեն տալիս նախագահականի ճաղերին մոտենանք, բայց նախագահը մեզ խոստումներ է տվել, ու այսօր չի ուզում իր խոստումներին դուրս գա պատասխան տա, որովհետեւ ասելու բան չունի… Ով է պատասխան տալու մեր երեխեքի համար: Վարչապետը թող դուրս գա ու պատասխանի՝ երբ են մեր երեխեքի սպանողներին պատժելու, ինչքան կարելի է կարուսելի պես մեզ ֆռռացնեն»,- ասաց բանակում մահացած Վալերիկ Մուրադյանի մայրը Նանա Մուրադյանը:
Արփինե ՍԻՄՈՆՅԱՆ
Կարդացեք նաև
