Ջավախեցիների հիմնախնդիրների թեմայով ասուլիսին հրավիրված ջավախեցի, ԱԺ նախկին պատգամավոր Հայկ Սանոսյանն այսօր այդպես էլ հիմնախնդիրներից չխոսեց: «Դե, խնդիրների մասին խոսում ենք, կան խնդիրներ, բայց պիտի պայքարենք, չէ,՞ այդ խնդիրների դեմ : Դե հիմա դուք ասեք, ի՞նչ խնդիրներ գիտեք»,- «Ելակետ» ակումբում լրագրողներին հարցրեց ԱԺ նախկին պատգամավորը:
Նա միայն վստահեցրեց, որ տարիների ընթացքում ջավախահայերի խնդիրներին լուծում է տրվում երկու պետությունների ջերմ հարաբերությունների արդյունքում.« Հիմնախնդիրները միշտ եղել ու լինում են, որովհետեւ հիմնախնդիրները երկու հարեւան պետությունների միջեւ են լինում: Միշտ էլ ինչ-որ խնդիրներ առկա են, ու դրանց լուծումը միջգերատեսչական հարաբերությունների արդյունքում է. որոշակի լուծում տրվում են»:
Չլուծված հիմնախնդիրների փոխարեն՝ պարոն Սանոսյանը մտաբերեց արդեն լուծված հիմնախնդիրներից մեկը .«Վիրահայոց թեմի կարգավիճակ տալու հարցը, որը լուծվեց մեր վեհափառ հայրապետների հանդիպման ժամանակ. անցյալ տարի հայրապետների հանդիպումն այդ հարցում մեծ առաջընթաց արձանագրեց»:
Լրագրողների մտահոգությանն էլ, թե հայոց լեզվի, հայկական հուշարձանների պահպանման խնդիրները չլուծվելու արդյունքում խորանում են, նախկին պատգամավորն ասաց. «Պարզապես չպետք է խորացնենք, սրենք, այլ ձեւեր պետք է գտնենք ու առաջարկություններ անենք, թե ինչ հարթության վրա… մի խոսքով, պետք է պայքարենք»: Նա այդպես էլ չհստակեցրեց պայքարի իր մոտեցումներն ու առաջարկությունները:
Կարդացեք նաև
Պատգամավորի համոզմամբ՝ Վրաստանի առաջիկա ընտրություններն էլ դժվար թե էական դեր ունենան ջավախահայության խնդիրների լուծման առումով. «Ընտրություններն այնտեղ էլ էական դեր չեն ունենա, լուրջ ընդդիմություն կա, այսօրվա իշխանությունները կհաղթեն ու խորհրդարանում մեծամասնություն կունենան եւ անմիջական ազդեցություն չեմ կարող արձանագրել, որ կոնկրետ այս ինչ բանը կփոխվի»:
Ըստ նրա, վրացահայերի մեծամասնությունն էլ իշխանամետ դիրքորոշում ունի:
Արփինե ՍԻՄՈՆՅԱՆ
