2013թ.-ի սեպտեմբերից Հայաստանի Ամերիկյան համալսարանում (ՀԱՀ) գործելու են բակալավրի աստիճան շնորհող երեք մասնագիտություններ` գործարար կառավարում, հաշվողական գիտություններ, անգլերեն եւ հաղորդակցություն: Չորս տարի տեւողությամբ բակալավրի աստիճան շնորհող ծրագրի նպատակն է` պատրաստել բազմակողմանի զարգացած մասնագետներ, որոնք հետագայում կկարողանան արդյունավետ աշխատել բազմամշակութային միջավայրում:
Այսօր ՀԱՀ-ում կայացած ասուլիսի ժամանակ բուհի նախագահ Բրյուս Պողոսյանը փաստեց, որ քսանամյա պատմության ընթացքում ՀԱՀ-ը շնորհել է մագիստրոսի յոթ տարբեր աստիճան, իսկ բակալավրի աստիճան շնորհող ծրագիրը կընդյալնի բուհի հնարավորությունները. «ՀԱՀ-ի իրականացրած ռազմավարական ծրագրերը բուհի առաջարկներն ավելի բազմազան կդարձնեն: Բայց դա չի նշանակում, թե կնվազի մագիստրոսական ծրագրերի հանդեպ նվիրումը: Հպարտ ենք դրանց նվաճումներով, քանի որ ՀԱՀ-ի շրջանավարտների 70 տոկոսը մնում է Հայաստանում: Դա ցույց է տալիս, որ նրանք աշխատանք են գտնում այստեղ»:
Պարոն Պողոսյանի խոսքով` ծրագիրը բուհին հնարավորություն կտա տարեկան ներգրավել երեքհարյուր ուսանող. «3 ուղղությամբ ընթանալիք ծրագրերը գործնական են, կիրառելի եւ կրկնօրինակված չեն այլ բուհերից»:
Կարդացեք նաև
Գործարար կառավարման բակալավրի ծրագիրը նախատեսում է պատրաստել տնտեսական զարգացմանը նպաստող կադրեր, այդ թվում` հաշվապահներ, տնտեսագետ-վերլուծաբաններ, շուկայագետներ, գործարար հաղորդակցության մասնագետներ եւ ձեռնարկատերեր:
Հաշվողական գիտությունների բակալավրի ծրագիրը գործելու է ՀԱՀ ճարտարագիտական եւ հաշվողական գիտությունների ֆակուլտետում, եւ ներկայումս իրականացնում է մագիստրոսի աստիճան շնորհող երկու ծրագիր` արդյունաբերական ճարտարագիտություն եւ համակարգերի կառավարում, համակարգչի եւ տեղեկույթի գիտություն:
Իսկ անգլերենի եւ հաղորդակցության բակալավրի ծրագրի նպատակն է` ուսանողներին զինել անգլերենի գերազանց իմացությամբ եւ հաղորդակցության հմտություններով` աշխատանքի շուկա մուտք գործելու կամ հետագա կրթությունը շարունակելու համար:
Նախագահ Պողոսյանը տեղեկացրեց, որ ծրագրերին զուգահեռ` բուհն ուսանողներին առաջարկելու է ֆինանսական օգնություն. «Նվիրված ենք այն գաղափարին, որ ուսման վճարի խնդիրներ ունեցող ուսանողները չպետք է զրկվեն կրթությունից: Ըստ ուսանողական առաջադիմության, կգործեն նաեւ կրթաթոշակներ»:
Լուիզա ՍՈՒՔԻԱՍՅԱՆ
