Ստեփանակերտի օդանավակայանը, որի գոյությունն անհանգստություն է պատճառում Ադրբեջանին եւ ժամանակ առ ժամանակ այնտեղից ինչ-ինչ հայտարարություններ են հնչում, մի քանի շաբաթից պատրաստ է թռիչքներ իրականացնել: Այսօր այս մասին հայտարարեց Երեւանի ճարտարապետության եւ շինարարության պետական համալսարանի ռեկտոր Հովհաննես Թոքմաջյանը, որն արդեն մի քանի թռիչք ունեցել է, բայց՝ ուղղաթիռով:
Ստեփանակերտի օդանավակայանը նախագծվել է Երեւանի ճարտարապետության եւ շինարարության պետական համալսարանի կողմից (նախագծի հեղինակ` Տիգրան Բարսեղյան), կառուցվել նույն բուհի խորհրդի անդամ, ՀՀ շինարարների միության նախագահ Գագիկ Գալստյանի ղեկավարությամբ:
Հովհաննես Թոքմաջյանը փաստում է, որը օդանավակայանը թռիչքի պատրաստվող բազե կամ ինքնաթիռ է հիշեցնում: Գաղափարը կյանքի կոչելու համար ինժեներական լուրջ լուծումներ են արվել, անգամ կտրվել-հանվել է երկու լեռ, որպեսզի թռիչքներն իրականացվեն առանց Ադրբեջանի տարածքին մոտենալու:
Կարդացեք նաև
«Սա աննախադեպ միջոցառում է քաղաքացիական ավիացիայի համար: Այնպիսի գերժամանակակից սարքավորումներ են տեղադրված օդանավակայանում, որոնք հսկում են թռիչքը՝ սկսած մի քանի հարյուր կիլոմետրերից: Կառավարման պուլտից էլ երեւում է եւ Երեւանը, եւ Բաքուն»,-ասում է պարոն Թոքմաջյանը:
Ըստ նրա, ԼՂՀ իշխանությունները մտադիր են նոր մասնաշենք էլ կառուցել: «Կարծում եմ՝ Ստեփանակերտի օդանավակայանն արդեն իր դերը խաղացել է, չնայած դեռ թռիչքներն, ըստ էության, չեն եղել: Միայն այն, որ Արցախի սիմվոլ տատիկն ու պապիկը, ինչպես նաեւ օդանավակայանի նկարները բոլոր, նաեւ մեր հակառակորդների կայքերում են դրված, արդեն նշանակում է, որ օդանավակայանն իր քաղաքական դերը խաղացել է: Չեմ կարծում, թե կարող է լինել որեւէ ինքնիշխան պետություն՝ առանց օդանավակայանի: Այս տեսակետից օդանավակայանի կառուցումը խիստ անհրաժեշտություն էր եւ նախկին տարիներին իրականացված ծրագրերի մեջ՝ լավագույններից մեկը»:
Գոհար ՀԱԿՈԲՅԱՆ
