Վերջերս Aravot.am-ը բողոք էր ստացել Մարալիկի բնակիչ Սուրեն Փիլոյանից այն մասին, որ Մարալիկի քաղաքապետարանը իր ձեռքից խլել է 18 տարվա 0,10 հեկտար տարածությամբ հողակտորը , որ իրեն հատկացվել է Ավանային սովետի հանձնաժողովի նախագահի կողմից և 1000 դոլարով վաճառվել է քաղաքի մեծահարուստներից մեկին` Ղարիբ Կարապետյանին:
«2009 թվականի փետրվարի 19-ին, առանց ինձ տեղյակ պահելու, քաղաքապետարանը իբր մրցույթ է հայտարարել ու իմ հողատարածքը հանձնել է Ղարիբ Կարապետյանին: 2010 թ. հողը բերքի հետ միասին իմ ձեռքից առան, քաղեցի, բերքը ձեռքիցս եկան-խլեցին, ինձ էլ դուրս շպրտեցին հողակտորից: Իրանք փաստաթղթերը ձևակերպել են 2009 թվականի ամսաթվով: Ես գնացի Մարալիկի քաղաքապետի մոտ` հարցեցի, թե ինչո՞ւ ես իմ հողը առանց իմ գիտության վաճառել, քաղաքապետն էլ իր հերթին իր մոտ կանչեց գյուղատնտեսության բաժնի պետին `Լյովա Ղազարյանին ու հարցրեց, թե ինչո՞ւ ես Սուրիկի հողը տվել Ղարիբին, նա էլ ոչ ավել, ոչ պակաս պատասխանեց` էդ հողը Ղարիբին հարմար է»,-պատմությունն այսպես ներկայացրեց Սուրեն Փիլոյանը :
Ըստ բողոքավորի, Մարալիկի քաղաքապետ Արտակ Գևորգյանը իրեն խորհուրդ է տվել բողոքել ուր ուզում է, ինքն էլ տարբեր նամակներ է հղել տարբեր ատյանների, ընդհուպ մինչև դատախազություն, սակայն քրեական գործ չի հարուցվել: Հետաքրքիրն այն է, որ պապիկը ԱԺ ընտրությունների ժամանակ, տեսնելով իրենց քաղաք ժամանած ԱԺ նախագահ Սամվել Նիկոյանին, որոշել է մոտենալ ու բողոքել պաշտոնյային, սակայն Մարալիկի քաղաքապետը կանխել է`ասելով. «Մի բողոքի Նիկոյանին կկանչեմ իմ կաբինետ, կխոսենք»: «Էստեղ էլ ինձ խաբեց, Նիկոյանն եկավ , քաշեց-տարավ կուլտուրայի պալատ, ելույթ ունեցավ, ելան նստան ավտոն գնացին: Հետո ասում է` էս մի քանի օրը սպասի, մի բողոքի, քո հողի հարցը կլուծենք, 10 փոխարեն 20 կտամ, մենակ թե մի բողոքի: Ես էլ ասում եմ` ինձ պետք չէ, իմ սեփական հողը ծախել ես, հիմա էլ ասում ես` արի առենդով հող տամ, ես ի՞նչ անեմ արենդով հողը, բա էս խիղճ ու սովե՞ստ է», -բորբոքվել էր ծերունին:
Մարալիկի քաղաքապետ Արտակ Գևորգյանն էլ Aravot.am-ի հետ զրույցում պարզաբանեց, որ այնպես, ինչպես ներկայացնում է Սուրեն Փիլոյանը, աբսուրդ է և անհեթեթություն, քաղաքացին տվյալ հողակտորը շահագործել է ապօրինաբար: Ըստ քաղաքապետի, այն պատկանում է պետության պահուստային ֆոնդին, որը վաճառելու կամ սեփականաշնորհելու իրավունքը չունեն, այն թե քաղաքապետարանի և կադաստրի քարտեզներով գրանցված է որպես պետական պահուստային ֆոնդի հող , որը կարող են տրամադրել միայն վարձակալության: Տվյալ դեպքում հայտարարվել է մրցույթ, որը հրապարկվել է «Հայաստանի Հանրապետություն» օրաթերթում, ու քանի որ քաղաքացին չի ներկայացել, այն պայմանագրային կարգով վարձակալության է տրամադրվել մեկ ուրիշին: «Այդ մարդն իրականում սեփականաշնորհման հանձնաժողովի որոշմամբ պետք է ունենար տասներորդական հողակտոր, որի տեղը սակայն մինչ օրս իր անհետեւողականության պատճառով չի ճշտել : Հետևաբար և քաղաքապետարանը չէր կարող տիրապետել իր հողի գտնվելու վայրը , մանավանդ որ կադաստրային հողային քարտեզներում ևս չի երևում տվյալ քաղաքացու հողակտորի տեղը: Ես ոչ մեկի իրավունքը չեմ խախտել, ես այժմ էլ պատրաստ եմ բավարարելու նրան մարդկային նորմին համապատասխան, նա իրավունք ունի ունենալու տասներորդական հողաբաժին, եթե իհարկե ցանկություն ունի վարձակալության»,- ասաց Մարալիկի քաղաքապետը:
Կարդացեք նաև
Ըստ նրա, Սուրեն Փիլոյանի մատնանշած հողակտորը գտնվում է Հյուսիս-հարավ մայրուղու հարևանությամբ, և այժմ ճանապարհաշինական նպատակների համար ստիպված են դադարեցնել այդ հատվածում գտնվող բոլոր կարգի հողատարածքների վարձակալությունը, իսկ սեփականշորհված հողատարածքի դեպքում բնակիչներին կտրվի փոխհատուցում: Արտակ Գևորգյանը ևս փաստեց, որ Սուրեն Փիլոյանի բողոքը քննարկվել է նաև դատախազությունում: Ի դեպ, քաղաքապետը նաև նշեց, որ Սուրեն Փիլոյանը բարեկամական կապ ունի իր հետ:
Նունե ԱՐԵՎՇԱՏՅԱՆ
