Երևանի պաշտպանության նախաձեռնությունների միավորումը, որի մաս է կազմում «ՈւրբանԼաբ Երևան» քաղաքաշինական ժողովրդավարացման ինստիտուտը հանդես է եկել հայտարարությամբ, որում արտահայտված են մայրաքաղաքի քաղաքաշինական մի շարք հիմնախնդիրների հետ կապված մտահոգություններ:
ՀՀ վարչապետ Տիգրան Սարգսյանին ինստիտուտի նախագահ Ս. Պետրոսյանը գրում է. «ՀՀ կառավարության կայքից տեղեկացանք, որ 23 մայիս 2012թ. ՀՀ վարչապետի գլխավորությամբ տեղի է ունեցել խորհրդակցություն Երևանի «Փոքր կենտրոնի» կառուցապատման կանոնակարգման աշխատանքների վերաբերյալ, որի արդյունքում ստեղծվել է աշխատանքային խումբ»:
Գրության մեջ ծանուցվում է, որ միավորումը «հայտնում է իր մտահոգությունը նշված գործընթացում ոչ միայն ներկայացված չլինելու համար, այլև թե խորհրդակցության, թե աշխատանքային խմբում հանրային սեկտորի ներկայացուցիչների իսպառ բացակայության համար»:
Հայտարարությունում կոչ է արվում հանրապետության կառավարությանը արմատապես փոխել ինչպես Երևանի, այնպես էլ ողջ երկրի տարածքում քաղաքաշինական գործունեության նկատմամբ վերաբերմունքն ու ապահովել հանրության լիարժեք ու արդյունավետ մասնակցությունը նմանատիպ գործընթացներին և առաջարկվում է Երևանի Փոքր կենտրոնի կառուցապատման և շինարարության կանոնակարգման աշխատանքային խմբում ընդգրկել նաև «վերջին տարիներին հասարակության աջակցությունը վայելած նախաձեռնությունների ներկայացուցիչ մասնագետների և ակտիվիստների:
ՀՀ վարչապետի հանձնարարությամբ հայտարարությունը ՀՀ կառավարության աշխատակազմի ղեկավար Դավիթ Սարգսյանը ի տնօրինություն հասցեագրել է Երևանի քաղաքապետ Տարոն Մարգարյանին, իսկ վերջինս էլ այն վերահասցեագրել է Երևանի գլխավոր Ճարտարապետ Նարեկ Սարգսյանին: Նա էլ նշված գրությունը ուղարկել է Երևանի Փոքր կենտրոնի կառուցապատման կանոնակարգման համար օրենսդրական առաջարկությունների, նախագծերի մշակման նպատակով ստեղծված աշխատանքային խմբի ղեկավար Ռուզաննա Ալավերդյանին:
ՀՀ քաղաքաշինության նախարարի տեղակալը գրության հեղինակին պատասխանել է, որ գնահատում է նրա հետաքրքրությունները և վստահեցնում, որ «առաջարկություններ ներկայացնելու դեպքում դրանք կքննարկվեն աշխատանքային խմբի կողմից և կտեղադրվեն ՀՀ քաղաքաշինության նախարարության պաշտոնական կայքում»:
Պատասխանի վերջում Ռուզաննա Ալավերդյանը նշում է. «Առաջարկությունների հեղինակները կհրավիրվեն աշխատանքային խմբի նիստերին»:
«Փաստինֆո» լրատվական գործակալություն
