«Ցավում եմ, որ իրադարձություններն այսպիսի ավարտ ունեցան: Պարոն Զոլյանն իմ կոլեգան է եւ ընկերը, բայց իր պահվածքն իսկապես ճիշտ չէր: Պետք է հաշվի առնել, որ պետական բուհի ղեկավարը ենթակա է համապատասխան լիազոր մարմնին. ԿԳ նախարարը մեր վերադասն է, հետեւաբար՝ նրան պետք է բոլորը ենթարկվեն»,-այսօր լրագրողների հետ հանդիպմանն ասաց ԵՊՀ ռեկտոր Արամ Սիմոնյանը՝ խոսելով Բրյուսովի անվան լեզվաբանական համալսարանի նախկին ռեկտոր Սուրեն Զոլյանի հետ կապված վերջին դեպքերից:
«Եթե ԵՊՀ-ում նույն բանը պատահեր, ես, միանշանակ, կհրաժարվեի պաշտոնիցս: Պետք չէ կատարվածի մեջ անձնական ինչ-որ վերաբերմունք տեսնել, պարզապես պարոն Զոլյանի կողմից կոռեկտ չէ աձնական կարծիքը նման կերպ արտահայտելը: Ամեն դեպքում, դա իր ընտրությունն է»,-ասաց ռեկտորը:
Նա հավելեց, որ աշխարհի երեսին ոչինչ հավերժ չէ` ոչ պաշտոնը, ոչ ամբիցիաները. «Եթե մարդը նորմալ աշխատում է, ոչ մեկը չի կարող նրան հեռացնել պաշտոնից: Չնայած այն հանգամանքին, որ ռեկտորների խորհրդի քննարկման թեմաները բաց են, պարոն Զոլյանի հետ չենք խոսել այդ մասին: Ինձ իրավունք չեմ վերապահել քննարկել նրա անձնական խնդիրները»,-հավելեց Արամ Սիմոնյանը:
Կարդացեք նաև
Լուիզա ՍՈՒՔԻԱՍՅԱՆ
