«Նախորդ տարի վճարովի ուսուցման համակարգում ուսանողների թվաքանակը քիչ էր, եւ բուհերը չէին ստանում բավարար հասույթ: Այս տարի Գնահատման եւ թեստավորման կենտրոնով անցել է շուրջ 8500 դիմորդ, որից 1/3-ը բաժին է հասել ԵՊՀ-ին: Անվճար հիմունքներով համալսարան է ընդունվել 381, իսկ վճարովի հիմունքներով` 3126 ուսանող»,-այսօր «Հենարան» ակումբում հայտնեց ԵՊՀ ռեկտոր, ԳԱԱ թղթակից անդամ Արամ Սիմոնյանը:
Նա փաստեց, որ ԵՊՀ-ի որոշ ֆակուլտետներում առկա են թափուր տեղեր` մասնավորապես` քիմիա, կենսաբանություն, կենսաֆիզիկա, ինֆորմատիկա, առարկաների գծով. «Կենսաֆիզիկան ամբողջ աշխարհում առաջընթաց է ապրում, իսկ մեզանում հակառակ պատկերն է: Հավանաբար, պատճառը դպրոցներում ֆիզիկայի հանդեպ ուշադրության անկումն է, ինչի հետեւանքով շրջանավարտները լավ չեն տիրապետում առարկային: Թափուր տեղեր կան նաեւ երկրաբանության, ջրաօդերեւութաբանության, եկեղեցաբանության ֆակուլտետներում, փոխարենը` ուսանողների հաջողված քանակություն կա ռուսաց լեզվի եւ գրականության, ֆրանսերեն լեզվի եւ գրականության, գերմաներեն լեզվի եւ գրականության, իսպաներեն լեզվի եւ գրականության ֆակուլտետներում»:
Արամ Սիմոնյանը նաեւ նշեց, որ կովկասագիտության ֆակուլտետում արդեն կա 50 ուսանող. «Դա կարեւոր մասնագիտություն է, ըստ ուսումնական պլանի` ուսանողները կտիրապետեն ադրբեջաներենին, հին վրացերենին, գրաբարին, ժողովուրդների երկրագիտությանը, մշակույթին եւ պատմությանը»:
Կարդացեք նաև
Դիմորդների ամենամեծ քանակությունը գրանցվել է, այսպես կոչված, «մոդայիկ» ֆակուլտետներում` միջազգային հարաբերություններ, քաղաքագիտություն, տնտեսագիտություն, ռոմանագերմանական, արեւելագիտություն, ինֆորմատիկա, կիրառական մաթեմատիկա, իսկ լրագրություն ֆակուլտետ 59 դիմորդ ընդունվել է անվճար հիմունքներով:
Պարոն Սիմոնյանի փոխանցմամբ` ԵՊՀ ամենաթանկ ֆակուլտետն է իրավագիտությունը` տարեկան 700.000 դրամ, եւ ամենաէժանը` երկրաբանությունը, մեխանիկան եւ ռադիոֆիզիկան` տարեկան 286.000 դրամ:
«Բանն այն է, որ մեր երկրում մասնագիտության գինը որոշելու հատուկ մեթոդիկա չկա: Գինը թելադրում է շուկայի պահանջարկը»,-ասաց ռեկտորը:
Լուիզա ՍՈՒՔԻԱՍՅԱՆ
