ՀՀ ոստիկանության տվյալներով՝ հետիոտնային անցումների հատման կանոնները խախտելու համար 2012 թ. առաջին վեց ամսում կազմվել է վարչական խախտումների վերաբերյալ 437 արձանագրություն:
Վարորդների իրավունքների պաշտպանությամբ զբաղվող «Աքիլլես » ՀԿ նախագահ Էդուարդ Հովհաննիսյանի խոսքով` շատ են դեպքերը, երբ հետիոտնին չզիջելու համար վարորդները տուգանվում են այն դեպքում, երբ իրականում մեղավորը հենց հետիոտն է լինում: «Հետիոտնը ունի պարտականություններ՝ մինչև անցումով անցնելը նա պետք է իմանա`որտեղ պետք է կանգնի: Հետիոտնը պետք է համոզվի, որ չի խանգարի ընթացող տրանսպորտային միջոցներին, որոնք հնարավորություն չեն ունենա կանգնելու և իրեն ճանապարհ տալու: Սակայն նրանք կանգնում են հետիոտնային անցումի վրա ու սպասում մինչև իրենց ճանապարհ տան»,- «Փաստինֆո» գործակալության թղթակցի հետ զրույցում նշեց Է. Հովհաննիսյանը:
Ըստ նրա` գործնականում տեսուչները հաշվի չեն առնում հետիոտնի պարտականությունները: Նրանց համոզմամբ` վարորդն անգամ հանդիպակաց երթևեկելի մասը հատող հետիոտնին պարտավոր է զիջել:
«ՓԱՍՏԻՆՖՈ»
