Ռուբեն Հակոբյանը վստահեցնում է, որ չնայած գարեջուր խմում է, բայց ինքը չէ
ՀՀԿ խմբակցության անդամ Արտաշես Գեղամյանը երեկ մեր հարցին, թե ինչու չէր մասնակցել «Հարսնաքարում» ծեծի արդյունքում մահացած սպա Վահե Ավետյանի հուղարկավորությանը, արդարացավ, որ շահարկումներ անել, հերթական անգամ հեռուստացույցի առջեւ երեւալը, ողբալի դեմքով երկու քայլ անելն ու կես ժամ հետո վետերոկում պիվա խմելը իր ձեւը չէ: Թե ով է այդպես արել՝ նա անուններ չտվեց՝ ասելով, որ հետաքննեք՝ իմացեք:
Քանի որ Վահեի հուղարկավորությանը քաղաքական գործիչներից ներկա էր «Ժառանգություն» խմբակցության ղեկավար Ռուբեն Հակոբյանը, ով հեռուստատեսությամբ երեւացել է, բավականին տխուր դեմքով հայտնել է իր ցավակցությունը, երեկ Aravot.am-ը նրանից հետաքրքրվեց, թե Վահեի հուղարկավորությունից հետո ինքը չի՞ գնացել «վետերոկում պիվա խմելու», եւ ընդհանրապես՝ տեղյա՞կ է, թե ով է նման դերասանական, թատրոնային խաղ խաղացել հուղարկավորության ժամանակ: Ռուբեն Հակոբյանի խոսքերով՝ «Ես սովորաբար գարեջուր խմում եմ: Բայց ես ինձ իրավունք չեմ վերապահում ամեն մի նման խոսքեր մեկնաբանել»: Մեր հարցին՝ կարո՞ղ է Գեղամյանը հենց Ձեզ նկատի ունի՝ Ռուբեն Հակոբյանը պատասխանեց. «Ուղղակի ես չգիտեմ, թե նա ինչ փաստեր գիտի կամ կա, թե չկա: Եթե դուք ցիտեցիք Արտաշես Գեղամյանից ինչ-որ մտքեր, ես վստահ կարող եմ ասել եւ հայտարարում եմ, որ նա բացարձակապես նկատի չունի «Ժառանգությանը»: Եթե կունենա փաստեր եւ կասի, որ նաեւ «Ժառանգությանը» նկատի ունի՝ կպատասխանեմ»:
Կարդացեք նաև
Արտաշես Գեղամյանն իր ասուլիսում նաեւ մեղադրում էր քաղաքական այն ուժերին, որոնք այսօր Վահե Ավետյանի միջադեպի շուրջ ակցիաներ են կազմակերպում՝ ասելով, թե ինչո՞ւ այդ նույն քաղաքական ուժերը Պողոս Պողոսյանի սպանության ժամանակ մոխիր չէին լցնում իրենց գլխին: Ռուբեն Հակոբյանը վստահեցրեց, որ Գեղամյանն այս հարցում նույնպես իրենց նկատի չունի. «Ես կարծում եմ, որ դա բացարձակապես չի վերաբերում «Ժառանգությանը»»:
Իսկ ՀԱԿ համակարգող Լեւոն Զուրաբյանը, անդրադառնալով ԲՀԿ-ի մասին իր դիրքորոշմանը, ասել էր, որ ընդդիմանալու տարբեր աստիճաններ կան, կարելի է ընդդիմանալ արմատապես, կարելի է ընդդիմանալ չափավոր, բայց եթե դու մաս չես կազմում կառավարությանը, ուրեմն ընդդիմություն ես: Այս առնչությամբ մենք պարոն Հակոբյանից հետաքրքրվեցինք՝ Ձեզ համար ընդունելի՞ է այդ ձեւակերպումը, որ ընդդիմություն կարելի է լինել չափավոր, արմատապես՝ նա պատասխանեց. «Ինձ համար ընդունելի է հետեւյալը՝ ընդդիմություն կա՛մ լինում են, կա՛մ չեն լինում, եւ քաղաքագիտական առումով էլ այդ մոտեցումն է: Կառուցողական ընդդիմություն, խիստ կառուցողական այլընտրանք, իմ իմանալով՝ քաղաքագիտական բառարանում այդ ձեւակերպումները եւս ծանոթ չեն: Բայց հիմա եթե մարդիկ սանդղակներ են դնում՝ դա իրենց գործն է: Ինձ համար ընդդիմություն կամ լինում են, կամ չեն լինում»:
ՀՌԻՓՍԻՄԵ ՋԵԲԵՋՅԱՆ
«Առավոտ» օրաթերթ
