«Ոսկե Ծիրան» միջազգային կինոփառատոնը հյուրընկալել է աշխարհահռչակ լեհ կինոռեժիսոր Ագնեշկա Հոլանդին: «Երեւանյան պրեմիերաներ» ծրագրում ներկայացվում է նրա` Ամերիկյան կինոակադեմիայի «Օսկարի» նոմինանտ «Խավարում» ֆիլմը: «Ոսկե Ծիրանը» Հոլանդին կշնորհի «Փարաջանովյան թալեր» մրցանակ:
Հոլանդին առավելապես հեղինակություն են բերել ռազմական եւ հոգեբանական դրամաները` նվիրված երկրորդ համաշխարհային պատերազմում լեհ հրեաների ճակատագրին: Իրական փաստերի վրա հիմնված «Խավարումը» պատմում է Լվով քաղաքի ջրմուղագործ Սոխայի մասին, ով իրեն քաջ ծանոթ ստորգետնյա կոյուղում թաքցնում է նացիստական արհավիրքներից խուսափած հրեաներին: «Գոլդեն Թուլիփ» հյուրանոցում կայացած ասուլիսի ժամանակ ռեժիսորը փաստեց, որ Լեհաստանում «Խավարումն» անհավանական հաջողության է հասել. «Դա ինձ համար հաճելի անակնակալ էր, քանի որ հատկապես երիտասարդությունը զգացական ազդեցության տակ էր: Թվում է, թե այն դժվար ընկալելի է, բայց հասանելի է լայն լսարանին: Հրեաների մասին թեման ես չեմ ընտրել, կարելի է ասել, որ թեման է ընտրել ինձ` դարձնելով իրեն գերին: Համարում եմ, որ առավել լավ եմ զինված այդպիսի ֆիլմեր նկարելու համար. Այդ նյութը ռեժիսորների մեծ մասն արժանահավատ կերպով չի ներկայացնում»:
Հոլանդի քույրը եւ աղջիկը նույնպես ռեժիսորներ են. «Աղջիկս միշտ փորձում էր խույս տալ ռեժիսորությունից, բայց ճակատագիրը, միեւնույնն է, վրա հասավ: Երբեւմն տարաձայնություններ են առաջանում. Օրինակ, ընտանեկան լուսանկար անելուց ամեն մեկն ուզում է կադրն իր ուզածով դասավորել: Խավարման մեջ մի քանի կարեւեր դրվագներ աղջիկս է նկարել: Նրա եւ քրոջս հետ նկարել ենք լեհական հեռուստաշարք: Երեք կնոջ համագործակցությունը համաշխարհային կինոյի մեջ եզակի դեպք է»:
Կարդացեք նաև
Լուիզա ՍՈՒՔԻԱՍՅԱՆ
