Այսօր Հունաստանի Ռեթիմնո քաղաքում ավարտվում է շախմատի ավանդական միջազգային բաց առաջնությունը, որին մասնակցում են նաեւ Հայաստանի երկու ներկայացուցիչներ՝ գրոսմայստեր Գաբրիել Սարգսյանն ու Տիգրան Մամիկոնյանը:
Հայաստանի ազգային հավաքականի անդամ, օլիմպիական եւ աշխարհի թիմային չեմպիոն Գաբրիել Սարգսյանը, որն սկսած երկրորդ տուրից գլխավորում է մրցաշարային աղյուսակը, միավորը բաժանեց ռուսաստանցի գրոսմայստեր Սերգեյ Վոլկովի հետ եւ 7,0 միավորով պահպանեց միանձնյա առաջատարի դիրքը: Այսօր՝ վերջին տուրում, Գաբրիելը սպիտակներով հանդիպում է Իսպանիայի ուժեղագույն շախմատիստներից մեկի՝ գրոսմայստեր Իվան Սալգադո Լոպեսի հետ, որում մրցաշարի հաղթող ճանաչվելու համար Գաբիից ընդամենը պահանջվում է չպարտվել:
Վերջին երկու տուրերում տարած հաղթանակների շնորհիվ մեր երկրորդ մասնակիցը՝ Տիգրան Մամիկոնյանը, զգալիորեն բարելավել է դիրքերը եւ վերջին տուրից առաջ 5,5 միավորով 25-րդն է:
Աշոտ ՀԱԿՈԲՅԱՆ
