Սիրիայի ընդդիմության ակտիվիստները հայտնել են կառավարական ուժերի կողմից հրասայլերի և ուղղաթիռների կիրառմամբ Հոմս նահանգի գյուղերից մեկում քաղաքացիական ավելի քան 150 անձանց սպանդի ենթարկելու մասին:
Ակտիվիստների ու ականատեսների համաձայն, հինգշաբթի օրը Թրեյմիսա գյուղը գրոհելուց առաջ կառավարական ուժերը հրետանային կրակ էին բացել այս բնակավայրի ուղղությամբ:
Սիրիայի ապստամբների առաջնորդներն իրենց հերթին պնդում են, որ զոհվածների թիվը գերազանցել է 200-ը:
Երկրի պետական լրատվամիջոցների փոխանցմամբ, Սիրիայի զինված ուժերն այս տարածքում մարտեր են վարել զինյալ խմբավորումներից մեկի հետ: Ինչպես և նախկինում իրականացված զանգվածային սպանությունների ժամանակ, այս անգամ ևս Սիրիայի կառավարությունը սպանությունների համար պատասխանատվությունը դրել է այն ուժերի վրա, որոնց կառավարությունը «զինյալ ահաբեկիչներ» է անվանում:
Կարդացեք նաև
Այս ընթացքում ՄԱԿ-ի անվտանգության խորհրդում քննարկվում է Սիրիայի կառավարության նկատմամբ նոր պատժամիջոցներ կիրառելու հնարավորությունն այն դեպքում, եթե վերջինս շարունակի ծանր զենք կիրառել քաղաքացիական անձանց վրա կատարվող հարձակումների ժամանակ:
Ռուսաստանը սակայն սպառնացել է կիրառել վետոյի իրավունքը Արևմուտքի կողմից առաջ քաշվող բանաձևի նկատմամբ՝ ցանկանալով պարզապես ևս երեք ամսով երկարաձգել Սիրիայում գործող ՄԱԿ-ի դիտորդների մանդատը:
ՄԱԿ-ի հատուկ հանձնակատար Քոֆի Անանը երկուշաբթի օրը կայցելի Մոկսվա՝ Սիրիայի շուրջ բանակցություններ անցկացնելու նպատակով:
Արմեն Հովհաննիսյան
«Ամերիկայի Ձայն»
