«ԱրմԻնֆո»-ին տված հարցազրույցում «Interactive TV»-ի սեփականատերերից մեկը՝ Կարեն Մարգարյանը հայտնել էր, որ իրենց ընկերության բաժնետոմսերի ամբողջական փաթեթը ձեռք է բերելու «Ucom» ՍՊԸ-ն, եւ Հայաստանի հանրային ծառայությունները կարգավորող հանձնաժողովը 2012 թ. հուլիսի 11-ի նիստում արդեն թույլատրել է բաժնետոմսերը վաճառել «Ucom» ՍՊԸ-ին:
Կարեն Մարգարյանը նաեւ հայտնել էր, որ հեռուստաընկերության բաժնետոմսերի վաճառքի հետ կապված որոշումը կապված է այլ բնագավառում ներդրումներ իրականացնելու մտադրության հետ: «Մենք որոշել ենք այդ բիզնեսը տալ նրանց, ովքեր ավելի պրոֆեսիոնալ են այդ ոլորտում»,- ասել էր նա:
Մինչդեռ «Interactive TV»-ին Հեռուստատեսության եւ ռադիոյի ազգային հանձնաժողովի կողմից 2006 թվականին ստացել է թիվ 121 արտոնագիրը՝ հեռուստահաղորդումների հեռարձակման համար: Արտոնագրի ժամկետը մինչեւ 2016 թվականի սեպտեմբերի 5-ն է:
Կարդացեք նաև
Aravot.am ՀՌԱՀ-ին գրավոր հարց ուղղեց՝ ինչպե՞ս են վերաբերվում հեռարձակման բիզնեսն այլոց փոխանցելու այս փաստին՝ հաշվի առնելով, որ «Հեռուստատեսության եւ ռադիոյի մասին» օրենքի 46 հոդվածի համաձայն՝ « Հեռուստառադիոծրագրերի հեռարձակման լիցենզիան չի կարող փոխանցվել կամ վաճառվել (օտարվել) այլ անձի»:
Մեր ստացած պատասխանում շրջանցված է խնդրի էությունը եւ միայն նշված է. «Տեղեկացնում ենք, որ ՀՌԱՀ-ը այս պահի դրությամբ «Ucom» ՍՊԸ-ի և «Interactive TV»-ի կողմից այդ հարցի կապակցությամբ որևէ գրություն չի ստացել»:
Աննա ԻՍՐԱՅԵԼՅԱՆ
