Թուրքական արտադրության «Վերամշակելով կյանքը` աղբի մեջ Դոստոեւսկի գտա» ֆիլմը մասնակցում է «Ոսկե ծիրանի» միջազգային վավերագրական ֆիլմերի մրցույթին: Ֆիլմի հերոս-երեխան մուրացկան է, հնահավաք, թերթավաճառ եւ աղբահավաք: Նրա կյանքը փոխվում է` Ստամբուլի ուսանողների հետ կայացած հանդիպումների արդյունքում, եւ այն հնացած գրքերի շնորհիվ, որոնք նա գտնում էր աղբարկղերում: Երեխան սկսում է հավաքել գրքերը եւ կարդալ:
«Գոլդեն Թուլիպ» հյուրանոցում կայացած ասուլիսի ժամանակ ռեժիսոր Էնիս Ռիզան պատմեց, որ 20 տարեկանում դեռահասը ծանոթանում է նաեւ Դոստոեւսկու գրքերից մեկի հետ եւ աստիճանաբար համալրում օգտագործված գրքերի իր խանութը:
Ռեժիսորի խոսքով` Թուրքիայում վավերագրական ֆիլմեր նկարահանողները հիմնականում ուշադրություն են դարձնում սոցիալական խնդիրներ ունեցող խավին. «Երկու նպատակ եմ դրել ֆիլմում` կյանքի ստորին դիրքից քննադատել տիրող համակարգը եւ հաջողության հասնելու հնարավորությունները ցույց տալ: Հերոսս գտնում է Դոստոեւսկուն, բայց իրականում ես եմ գտնում երեխային»:
Կարդացեք նաև
Խոսելով Երեւանից, Էնիս Ռիզան նշեց, որ այն մեծ տեղ ունի իր սրտում. «Հայերենը հասկանալու կարիք եմ զգում, չնայած այն հանգամանքին, որ այստեղ շատ ընկերներ եմ ձեռք բերել: Կարծում եմ` վավերագրականներ նկարահանող ռեժիսորների ընկերությունն առավել խորն է սովորականից, քանի որ նրանք կյանքին քննադատաբար են մոտենում»:
Լուիզա ՍՈՒՔԻԱՍՅԱՆ
