Չնայած Հայաստանի կառավարությունը տնտեսության զարգացման եւ արտահանման ուղղությամբ որոշակի ռեֆորմներ անում է, բայց դրանք էական ազդեցություն չեն ունենում: Այսօր «Նոյյան տապան» ակումբում նման կարծիք հայտնեց Հայաստանի գործատուների հանրապետական միության նախագահ Գագիկ Մակարյանը: Նրա ներկայացմամբ` մի քիչ աճ է արձանագրվել հանքարդյունաբերության ոլորտում, մի քիչ` գյուղատնտեսության, բայց ընդհանուր տնտեսության մեջ դա չնչին բան է եւ դրանք շատ փոքր տեղաշարժեր են ու շատ դանդաղ են ընթանում:
Ըստ պարոն Մակարյանի, որպեսզի ռեֆորմներն իսկապես արդյունք տան, պետք է դրանք շղթայով իրականացնել, այլ ոչ թե ինչպես այժմ է անում կառավարությունը` առանձին կտորներով: Այս դեպքում, ըստ մասնագետի, նման բարեփոխումները բարդացնում են իրավիճակը:
Պարոն Մակարյանի հավաստմամբ` իր տեղեկություններով, այդ լոկալ ռեֆորմները հաճախ մեծ պայքարի ուժով են անցնում, որովհետեւ կան պետական կառույցներ, որոնք ընդդիմանում են մի շարք լոկալ ռեֆորմներին. «Որովհետեւ դա կամ իրենց լծակներն է թուլացնում, կամ շահերի բախում է լինում: Օրինակ՝ էկոնոմիկայի նախարարությունը հաճախ դժգոհում է, որ իր բարեփոխումներին ընդդիմանում է ՊԵԿ-ը: Ես կասեի ` հալալ է ՊԵԿ-ին, որ ունի այնպիսի ինտելեկտուալ բազա, որ կարողանում է լուրջ հիմնավորումներով հակադրվել էկոնոմիկայի նախարարության ռեֆորմներին եւ հիմնավորումներին եւ ՊԵԿ-ի անձնական կամքով ու ղեկավարությամբ հակադրվում են էկոնոմիկայի եւ ֆինանսների նախարարություններին: Ուրեմն պետք է էկոնոմիկային ասել, որ դուք էլ պետք է ձեր բազան ու կամքը ուժեղացնենք, որ ավելի խիզախ լիենք… ու մանր-մունր բարեփոփումներով արդյունքի չեք հասնի»:
Կարդացեք նաև
Խոսելով ՓՄՁ-ին տրվող հարկային արտոնությունների եւ վարկավորման մասի՝ պարոն Մակարյանը կարծիք հայտնեց, որ դրանցից ավելի շատ օգտվում է խոշոր բիզնեսը: Պարոն Մակարյանի խոսքերով` օրինակ` ավելացված արժեքի հարկի վճարման հետաձգումը, որը կատարվում է այն դեպքում, երբ սարքավորումներ պետք է ներմուծվեն. «22-24 բիզնես է վարկավորվում, որտեղ 2-3 են փոքր, հիմնականում խոշոր են, լավագույն դեպքում` միջին»: Պատճառը, որ արտոնություններից ՓՄՁ-ն գրեթե չի կարողանում օգտվել, ըստ պարոն Մակարյանի, բյուրոկրատական մեխանիզմներն են, այսինքն՝ փաստաթղթային բարդագույն չափանիշներ են սահմանված, որ շատերը ուղղակի չեն ուզում գլուխ դնել դրանց հետ:
Նելլի ԲԱԲԱՅԱՆ
