«Սևանա լճի վերաբերյալ նոր, առավել ընդունելի իրավական փաստաթղթի մասին խոսելը այսօր արդեն հնարավոր չէ, քանի որ 320 մլն խորանարդ մետր ջուր բաց թողնելու վերաբերյալ կառավարության օրենսդրական նախագիծը ՀՀ Աժ-ն արդեն ընդունել է նաև երկրորդ ընթերցմամբ, իսկ պատգամավորներն էլ արձակուրդ են մեկնել: Սակայն քաղաքացիական հասարակության և կառավարության գործնական շփումները լճի խնդիրներին ընդունելի լուծումներ տալու հարցում շարունակվում են և ունեն դրական արդյունքներ»,- այսօր «Փաստինֆո»-ի թղթակցին ասաց «Հանուն մարդկային կայուն զարգացման ասոցիացիա» ՀԿ նախագահ Կարինե Դանիելյանը:
Ըստ Կարինե Դանիելյանի՝ Սևանը գտնվում է առողջացման վիճակում, սակայն դեռ լճում ընթացող դրական շարժը կամ դրական փորձը հնարավոր չէ ներկայացնել, քանի որ այդ ջրային ավազանը գտնվում է վտանգավոր անցումային փուլի մեջ: Ըստ նրա, եթե լճի կենտրոնական հատվածներում առողջացման երևույթները հստակ արձանագրելի են, ապա նույնը չի կարելի ասել առափնյա հատվածների մասին:
Նշենք, որ համաձայն բնապահպանության փոխնախարար Սիմոն Պապյանի՝ այսօր կառավարությունում նույնպես 320մլն խմ ջրի բացթողման մասին խոսակցություններ չեն ընթանում, քանի որ եղանակային պայմանները նպաստավոր են և ջուրը Սևանա լճից շատ ավելի պակաս է բաց թողնվում:
«Փաստինֆո» լրատվական գործակալություն
