արխիվային լուսանկար
ՄԱԿ-ի Զարգացման ծրագրով, Հայաստանի արտակարգ իրավիճակների նախարարության հետ համագործակցությամբ 2011թ.-ից իրականացվում է «Աղետների նախապատրաստվածության եւ ռիսկերի նվազեցման ազգային կարողությունների հզորացում» ծրագիրը: Դրա շրջանակներում Տավուշի մարզի Այգեհովիտ գյուղի խաղողի այգիներից մեկում տեղադրվել են պինդ թելերից հյուսված հակակարկտային ցանցեր: Հուլիսի 8-ին այդտեղ փռվել է ցանցերի փոքր խմբաքանակ:
Այգեհովտի գյուղապետ Լեւոն Գրիգորյանն «Առավոտի» թղթակցին ասաց, որ հուլիսի 17-ին Այգեհովիտ են ժամանելու ցանցն արտադրող իտալական ընկերության ներկայացուցիչները, ընդհանուր առմամբ 3000 քառակուսի մետր տարածքում հակակարկտային ցանցեր են փռվելու:
Լ. Գրիգորյանի խոսքերով` բացի խաղողի վազերը կարկուտից պաշտպանելուց, ցանցերը հասունացած բերքը պաշտպանում են թռչուներից, մրջյուններից, մժեղներից: Հակակարկտային ցանցերը 12 տարվա պիտանելիության ժամկետ ունեն: Այդ ցանցերը Հայաստանում առաջին անգամ են կիրառվում, սակայն լայն կիրառություն ունեն Եվրոպայում եւ Թուրքիայում: Ծրագիրը փորձնական է, ժամանակի ընթացքում պարզ կդառնա Հայաստանի խաղողի այգիներում հակակարկտային ցանցերի լայն կիրառման նպատակահարմարությունը:
Ոսկան ՍԱՐԳՍՅԱՆ
Կարդացեք նաև
