2011թ. ապրիլին փլուզում եղավ միջպետական ճանապարհից Իջեւանի տարածաշրջանի Ներքին Ծաղկավան գյուղ տանող միակ, ասֆալտապատ ճանապարհին: Այդ ճանապարհի առաջին կիլոմետրում սողանքից փլվել է 30 մ երկարությամբ, 15 մ լայնությամբ եւ 20 մ խորությամբ հատված, հողը թափվել է գյուղը սնուցող, 130 մմ տրամագծով խմելու ջրագծի վրա, շարքից հանել այդ ջրագծի 30 մետրանոց հատվածը: Պատահարից հետո ջրագծի վնասված հատվածը արագ վերականգնվել է: Գյուղ մտնող ճանապարհը թեեւ նեղացել, սակայն երթեւեկելի է:
Ի՞նչ է փոխվել անցած մեկ տարի եւ 3 ամսվա ընթացքում: Ներքին Ծաղկավան համայնքի ղեկավար Նաիրի Աթաբեկյանը հայտնեց, որ ճանապարհի երթեւեկելի մասում, ասֆալտին 2 սմ լայնությամբ եւ 2 մ երկարությամբ ճեղք է գոյացել, որը գնալով աճում է: Ճեղքի լայնանալով՝ ճանապարհն ամբողջությամբ կարող է փլվել: Այդ դեպքում հողը կթափվի մոտ 20 մ բարձրությունից եւ հետո շատ դժվար ու ծախսատար կլինի գյուղն «արտաքին աշխարհին» կապող միակ ճանապարհի նորոգումը:
Նաիրի Աթաբեկյանն ասաց, որ այս տարվա մայիսի 5-ին կապի եւ տրանսպորտի նախարարությունից եկել են, սողանքի վայրում ուսումնասիրություն կատարել: Դրանից հետո գյուղապետը եղել է Տավուշի մարզպետարանի տրանսպորտի բաժնում, ուր ծանոթացել է ճանապարհի վերականգնման նախագծին եւ ստորագրությամբ հավանություն տվել դրան :
Կարդացեք նաև
– Այդ նախագծով նախատեսվում է, որ նոր ճանապարհը ձգվելու է սողանքի վայրից աջ գտնվող տարածքով, 4-5 տուն այդ գոտուց հանվելու է, դրանից տերերին փոխհատուցում կտրվի,- ասաց Ն. Աթաբեկյանը:
Գյուղապետը չգիտի, թե որքան է կազմում նոր ճանապարհի կառուցման արժեքը, եւ այդ ծրագիրը երբ կսկսի իրականացվել: Ավելի քան մեկ տարի պահանջվեց ճանապարհի վերականգնման նախագիծ պատրաստելու համար, որքա՞ն ժամանակ կպահանջվի ֆինանսավորում սկսելու եւ ճանապարհը կառուցապատելու համար: Իսկ սողանքը չի սպասում, այն ակտիվ է: Այդ ճանապարհը ներկայումս բանուկ է, այնտեղով երթեւեկողների գլխին մշտապես կախված է տարերքի «դամոկլյան սուրը»:
Ոսկան ՍԱՐԳՍՅԱՆ
