Կիեւյան փողոցի երկու կողմերի ծառերը որդնել են, չնայած, որ վերջերս են սրսկվել: Կիեւյանի բնակիչների խոսքերով, ծառերի տերեւները կրծելուց հետո, որդերը թափվում են գետնին, անցորդների վրա. «Կանաչ գույնի որդեր են, շատ արագ բազմանում են, ամբողջ գետինը որդ է ման գալիս, մարդիկ չեն կարողանում քայլել այդ հատվածով: Էս շոգին տերեւ չի մնացել ծառերի վրա: Կրծելուց հետո մեկ էլ տեսնում ենք շենքերի պատերով դեպի բնակարաններ են բարձրանում, ուր ասես, որ չենք ահազանգել, քաղաքապետարան, թաղապետարան: Արաբկիրի թաղապետարանից ասում են` գիտենք, որ ծառերը վարակված են, բայց ոչինչ անել չենք կարող, մեկ անգամ արդեն դեղ արել ենք, սակայն հիմա փող չունենք»,-Aravot.am-ի հետ զրույցում իր դժգոհությունը հայտնեց Կիեւյանի տարեց բնակիչներից մեկը, որը սակայն, խոսում էր իր հարեւանների անունից եւս:
Արաբկիր վարչական շրջանի կանաչապատ տարածքների պատասխանատուն «Արաբկիր-կամար» ՓԲԸ-ն է: Aravot.am-ի հարցերին ի պատասխան, ընկերությունից հայտնեցին, որ առաջին սրսկումն արդեն արել են, իսկ 2-րդը պետք է լինի օգոստոսին՝ որդերի սեզոնին: Հարցին, թե որդերը սեզոնից դուրս են փաստորեն կրկին հայտնվել եւ արդյոք նման դեպքերում սրսկումը սահմանված ժամկետից շուտ չի կատարվում, ընկերությունից ասացին. «Գոյություն ունի նախահաշիվ եւ մենք այդ ծախսերը կատարում ենք այդ հաշվից: Մյուս սրսկումը կատարելու ենք օգոստոսին, դրանից շուտ չենք կարող»:
Լուսինե ԲՈՒԴԱՂՅԱՆ
Կարդացեք նաև
