Թուրքիայում ծնված, բայց հայկական ծագում ունեցող ռեժիսոր Օզջան Ալպերի «Ապագան ձգվում է հավերժ» ֆիլմը մասնակցում է «Ոսկե ծիրան» կինոփառատոնի միջազգային խաղարկային ֆիլմերի մրցույթին:
«Գոլդեն Թուլիփ» հյուրանոցի «Վիվալդի» սրահում կայացած ասուլիսի ժամանակ ռեժիսորը հայտնեց, որ ֆիլմով ցանկացել է ցույց տալ Թուրքիայի ժողովուրդների մերժված եւ անուշադրության մատնված մշակույթը. «Աշխատանքիս բարդությունը կայանում է նրանում, որ ընտրածս թեմաները Թուրքիայում քաղաքական խնդիրներ են առաջացնում, մինչեռ նպատակ չունեմ քաղաքան ինչ-որ գաղափարախոսություն տարածել: Թուրքիան նմանեցնում եմ բազմաբնակարան շենքի, որի սենյակներում գտնվող ազգերի մշակույթը փակի տակ է: Հերոսը քուրդ կին է , բայց խնդիրը բոլոր ազգերին է վերաբերում, այդ թվում՝ Եղեռն տեսած հայերին»:
Ընդհանրացնելով հերոսուհու կերպարը՝ ռեժիսորը նշեց, որ կանայք հասարակական հիշողության կրողն են. «Թուրքիայում արգելված է եղել այլ լեզուների գործածությունը, եւ կանայք են իրենց լեզվով պահպանել եւ սերունդներին փոխանցել ազգի պատմությունն ու մշակույթը»:
Կարդացեք նաև
Օզջան Ալպերը նկատեց, որ վերջին շրջանում Թուրքիայում մեղմացել է ազգերի հանդեպ անհանդուրժողականությունը. «5 տարի առաջ նման ֆիլմ չէի համարձակվի նկարահանել: Ֆիլմը դիտել է 40.000 մարդ, սակայն իրական հերոսները ճնշումների չեն ենթարկվել: Նրանք բացահայտ պայքարում են իրենց իրավունքների համար»:
Լուիզա ՍՈՒՔԻԱՍՅԱՆ
