«Ոսկե Ծիրան» կինոփառատոնի շրջանակում չիլիացի ռեժիսոր Խոսե Լուիս Տորրես Լեյվայի «Ամառ» ֆիլմը մասնակցում է միջազգային խաղարկային ֆիլմերի մրցույթին: «Ամառը» ներկայացնում է Չիլիի հարավում գտնվող առողջարանում հանգստացողների եւ աշխատակիցների կյանքը. նրանք հանգստանում են բնության գրկում, մեքենա վարել սովորում, համբուրվում առաջին անգամ՝ աստիճանաբար ի հայտ բերելով երջանկության պատառիկներ:
Ռեժիսորը զգալի թվով կարժամետրաժների եւ տեսաֆիլմերի հեղինակ է, սակայն «Ամառը» նկարահանել է ոչ պրոֆեսիոնալ տեխնիկայով. «Ֆիլմերում արտահայտած հիշողություններս պահպանվել են դեռեւս մանկուց, երբ ապրում էի տատիկիս ու պապիկիս հետ ու ամեն օր ուսումնասիրում մեր գյուղը: Ֆիլմով ցանկացել եմ ցույց տալ հերոսների ընտանեկան հարաբերությունները եւ թե ինչպես են դաստիարակում երեխաներին»:
Խոսելով Չիլիի կինեմատոգրաֆիայից՝ Խոսե Լուիս Տորրես Լեյվան փաստեց, որ այն բուռն զարգացում չի ապրում. «Ֆինանսական միջոցները բավարար չեն եւ պետությունն ուշադրություն չի դարձնում կինեմատոգրաֆիային: Բացի այդ՝ այլ երկրների եւ Չիլիի կինոռեժիսորների միջեւ համագործակցությունը թույլ է»:
Կարդացեք նաև
Լուիզա ՍՈՒՔԻԱՍՅԱՆ
