Քաղաքագետ Ալեքսանդր Մարգարովը, խոսելով հուլիսի 19-ին Ղարաբաղում կայանալիք ընտրություններից, նշեց, որ այնտեղ հասարակության մեջ կա համախմբվածություն, եւ շեշտեց, որ չպետք է կարեւորել, թե ով կընտրվի, կարեւորը՝ Արցախում կայանալիք ընտրությունների երեւույթն է. «Արցախի բնակչության համար ընտրությունները դարձել են առօրյա քաղաքական գործընթացի շարունակական նորմալ երեւույթ: Իսկ այն, որ հաճախ ասվում է, թե Ղարաբաղում չկա ընդդիմություն՝ իրականությանը չի համապատասխանում, եւ նման կարծիք հայտնողների համար ընտրությունները հնարավորություն կտան գտնել իրենց տեղը»,- ասաց Մարգարովը:
Քաղաքագետ Հարություն Մեսրոպյանն էլ, Արցախում կայանալիք ընտրությունների մասին հետեւյալ կարծիքի է. «Արցախի ընտրությունները ցույց են տալիս, որ գոյություն ունի մի պետություն, որն անկախ նրանից, մյուս պետությունները ընդունում են իրեն, թե՝ ոչ, այն գործում է: Չճանաչված պետության մեջ դրանք անցկացվում են արդեն չորրորդ անգամ: Եվ դա շատ կարեւոր է: Բացի այդ՝ ամեն անգամ, երբ ամբողջ աշխարհում խոսք է գնում Արցախի ընտրությունների մասին՝ Ադրբեջանը հոգեբանական ճնշվածության, լարվածության մեջ է հայտնվում: Իսկ ինչ վերաբերվում է որակին՝ դա այլ հարց է, միայն մեր խնդիրն է»:
Եվա ՀԱԿՈԲՅԱՆ
