Հուլիսի 8-ին Իջեւան քաղաքի Արցախյան փողոցում այրվել է 46-ամյա Արմինե Ալեքսանյանի 3 սենյականոց ֆիննական վագոն-տնակը: Նա «Առավոտի» թղթակցին ասաց, որ հրդեհից ոչնչացել է նախորդ տարիներին վարկով ձեռք բերած սառնարանը, կահույքը, նաեւ հեռուստացույցը, անկողինը եւ այլն:
Արմինեն կարծում է, որ հրդեհի պատճառը եղել է էլեկտրական լարերի կարճ միացումը: Վագոն-տնակից կտորներ են մնացել, գույքից եւ փաստաթղթերից փրկվել է միայն Արմինեի անձնագիրը. այն գտնվում էր անձնագրային բաժանմունքում, որպեսզի նորով փոխարինվի:
Կինը հիմնական աշխատանք չունի, նա օրավարձով իջեւանցիներին օգնում է տնային գործերում: Արմինե Ալեքսանյանի տունը երկրորդ անգամ է այրվում: 1991թ. Լեռնային Ղարաբաղի Լենինավան գյուղում նրա տունն այրվել է ադրբեջանցիների ոտնձգություններից, ընտանիքը տեղափոխվել է Իջեւան, օթեւանել տեղի հյուրանոցում: Հետո Արմինեի ամուսինը գնացել է Ռուսաստան եւ չի վերադարձել: Ներկայումս Արմինեի չափահաս երկու տղաները ու աղջիկը Ռուսաստանում են, սակայն հնարավորություն չունեն մորը օգնելու: Հրդեհի հետեւանքով կինը եւ իր դպրոցական աղջիկը կացարան չունեն: Նրանց իր վագոն-տնակում ժամանակավորապես ընդունել է իջեւանցի ընկերուհին:
Կարդացեք նաև
Արմինե Ալեքսանյանը օգնության խնդրանքով դիմել է Իջեւանի քաղաքապետ Վարդան Ղալումյանին: Քաղաքապետն ասաց, որ նրան օգնելու համար համայնքի բյուջեի հնարավորությունները սուղ են, սակայն ըստ հնարավորի կաջակցեն անտուն, առանց գույքի մնացած ընտանիքին:
Ոսկան ՍԱՐԳՍՅԱՆ
