Հայաստանում Ֆրանսիայի արտակարգ եւ լիազոր դեսպան Անրի Ռենոն անդրադառնալով արտոնագրերի տրամադրմանը, վիզային ռեժիմին՝ մեկնաբանեց ֆրանսիական դեսպանատան հետ կապված դժգոհությունները: Նա հայտնեց, որ մի քանի ամիս է, ինչ մեկնարկել է վիզային ազատ ռեժիմի ու վերադարձի վերաբերյալ պայմանագրի հետ կապված լուրջ գործընթաց, որի շահառուները կլինեն որոշակի թիրախային խմբեր, մասնավորապես ուսանողները, գիտնականները, գործարարները:
Ինչ վերաբերում է Ֆրանսիական դեսպանատան հյուպատոսական ծառայության աշխատանքին՝ ինքը որպես դեսպան գոհ է, քանի որ նրա խոսքով, աշխատակիցները անգամ իրենց աշխատաժամից երկար են մնում՝ փորձելով պատասխանել բոլոր դիմումներին: Սրա կողքին, Անրի Ռենոն ընդունում է, որ հատկապես ամառային զբոսաշրջային սեզոնին շատ են դժգոհությունները՝ ուշացումների պատճառով: Դա էլ, ըստ դեսպանի, կապված է ամռան ամիսներին զբոսաշրջության մեկնողների թվի կտրուկ մեծացման հետ:
Գոհար ՀԱԿՈԲՅԱՆ
