«Հավես չունեմ այդ աղբը լսելու: Միեւնույնն է՝ ինչ էլ գրեք, սխալ է ընկալվելու: Մարդը հրաշալի պատասխանել է հեռախոսով, հերքել է: Ես այդ ամենի տակ ստորագրում եմ»,- Aravot.am-ի հետ զրույցում ասաց երգչուհի, Ազգային ժողովի պատգամավոր Շուշան Պետրոսյանը՝ անդրադառնալով ամուսնու՝ Արման Հարությունյանի Facebook –ի էջում գրառմանը:
Հիշեցնենք, որ Ա. Հարությունյանը գրել էր. «Զզվելի է. իրենց պատմությունն են կերտում` ողբերգությունը դրոշակ դարձնելով։ Սառնասրտորեն կսատկացնեի ոմանց»։ Հետո նշել էր, թե մարդիկ անկարգ եղել են և կան. «Ստեղծված իրավիճակից էլ առիթավորվում են՝ առանց խոր մտածելու, որ ամենահամբերատար մարդուն էլ կարելի է հունից հանել ու այդ պատճառով չափալախ ուտել բերնին»: Եվ հավելել. «Փառք ու պատիվ մեր ոստիկաններին։ Իրենք մեր անվտանգության միակ երաշխիքն են։ Պատկերացնո՞ւմ եք՝ ոստիկանները չհսկեին ստեղծված իրավիճակը։ Կքանդեն, կփչացնեն ու նման բաներ։ Իսկ ի՞նչ պետք է անեն մեր ոստիկանները։ Կանգնեն, նայե՞ն։ Ո՛չ։ Պետք է սաստեն և պատժեն այդ չգիտեմ ինչերի անթույլատրելի գործողությունները»։
Իսկ ավելի ուշ Asekose.am– ին պարզաբանել էր: «Իմ վերջին գրառումները ոչ մի կապ չունեն մոմավառության հետ, դրանք պատասխան են նրանց, ովքեր սոցցանցում չարախոսում են, հերյուրանքներ ու նույնիսկ սեռական բնույթի հայհոյանքներ են տարածում կնոջս հասցեին»:
Կարդացեք նաև
Արփինե ՍԻՄՈՆՅԱՆ
