«Այլ համատեքստում եմ ցանկանում պատասխանել այդ հարցին՝ որեւէ կերպ, որեւէ բան չշահարկելու համար. ցանկանում եմ, որ, առհասարակ, որեւէ նմանատիպ կամ զուգահեռներ ունեցող այլ իրադարձության, հանցագործության, բացասական երեւույթների դեպքում գործեն սեւով սպիտակի վրա գրված ՀՀ համապատասխան օրենքները եւ վերջ: Բնորոշումներ, ձեւակերպումներ, եզրակացություններ չարժե այստեղ անել, որովհետեւ կա քրեական օրենսգիրք, որը տալիս է բոլոր հարցերի պատասխանները»,- ասաց ԲՀԿ հասարակայնության հետ կապերի պատասխանատու Տիգրան Ուրիխանյանը՝ պատասխանելով Aravot.am-ի հարցին՝ ի՞նչ եք մտածում «Հարսնաքար» ռեստորանային համալիրում տեղի ունեցած ողբերգական իրադարձությունների զարգացումների շուրջ. արդյոք, այս հասարակական շարժումը կարո՞ղ է վերաճել ավելիի, արդյոք, սա հայ օլիգարխիայի վերջի սկի՞զբն է:
«Ես կուզեի, որ մեզանում ձեւավորվի եւ կայանա մշտապես, անընդմեջ գործող շարժում, ակտիվ եվ գիտակից քաղաքացիական հասարակություն, լինեն այդ հասարակությունից ծնված պետական պաշտոնյաներ, այդ թվում նաեւ՝ իրավապահ համակարգի, որոնք համապատասխան մտածելակերպ ունեցող մարդկանց հարիր՝ կաշխատեն սեւով սպիտակի վրա գրված օրենսգրքերի համաձայն: Որպես ցենտրիստ, ես շատ եմ հավատում եւ շատ եմ կարեւորում այն հանգամանքը, որ հասարակական վերահսկողությունը լինի անընդմեջ այն բոլոր իրադարձությունների հետ կապված, որտեղ ՀՀ օրենքները եւ Սահմանադրությունն ասելիք ունեն»,- ասաց մեր զրուցակիցը:
Նելլի ԳՐԻԳՈՐՅԱՆ
