Այս պահին Կենտրոն եւ Նորք-Մարաշ համայնքների ընդհանուր իրավասության դատարանում ՀԱԿ ակտիվիստ Տիգրան Առաքելյանի դատավարությունն է: Մեղադրող դատախազ Հակոբ Մարտիրոսյանը հրապարակեց իր ճառը: Մինչ նա կսկսեր կարդալ՝ դատավոր Գագիկ Պողոսյանը նկատողություն արեց՝ ասելով, որ մեղադրական ճառը կարդում են կանգնած, ոչ թե նստած: Ի պատասխան՝ դատախազն ասաց, որ ինքը ջերմություն ունի, ուստի խնդրեց չկանգնել:
Նա ասում էր, որ ՀԱԿ ակտիվիստները «առողջության կարճատեւ քայքայում» են հասցրել ոստիկաններին. «Ամբաստանյալները կատարված գործողությունները հանցագործություն չեն համարում եւ իրենց մեղավոր չեն ճանաչում: Իսկ ինքը գտնում է՝ հասարակական կարգը կոպիտ կերպով խախտել են»: Հատուկ Սարգիս Գեւորգյանի համար նա մանրամասնեց, թե ինչ է հասարակական կարգը, ասելով, որ նիստերից մեկի ժամանակ Սարգիսը չգիտեր ու հարցնում էր, թե ո՞րն է դա:
Նիստը շարունակվում է:
Հիշեցնենք, որ ՀԱԿ ակտիվիստները մեղադրվում են անցած տարվա օգոստոսի 9-ին Խնկո -Ապոր գրադարանի մոտ տեղի ունեցած միջադեպի ժամանակ ոստիկանների վրա հարձակվելու համար: Միջադեպին մասնակցած 6 ակտիվիստները ստորագրությամբ ազատ էին արձակվել, իսկ Տիգրան Առաքելյանը մինչ այժմ կալանավորված է: Ըստ ոստիկանության, գրադարանի մոտ միջադեպն սկսվել էր այն բանից, երբ ոստիկանները մի երիտասարդի հորդորել էին շանը ման տալ դնչկալով, մինչդեռ երիտասարդների պնդմամբ, միջադեպը սկսվել էր ոստիկանների սադրիչ գործողությունների հետեւանքով:
Հռիփսիմե ՋԵԲԵՋՅԱՆ
