Երեկ «Առավոտը» դիմել է «Ժառանգության» առաջնորդ Րաֆֆի Հովհաննիսյանին հետեւյալ հարցով. «Վերջերս քաղաքական մի շարք գործընկերներ, մտավորականներ ու քաղաքացիական շրջանակներ կարծիք հայտնեցին, որ առաջիկա նախագահական ընտրություններում իրենց համար նախընտրելի է Ձեր թեկնածությունը: Ի՞նչ կասեիք այդ մասին՝ դրանք պաշտոնական կամ, թեկուզ, կազմակերպված հայտարարություննե՞ր են, թե՞ առանձին ինքնաբուխ արտահայտություններ»: Պարոն Հովհաննիսյանը պատասխանեց. «Իմ մասնակցության ձեւն ու բովանդակությունը կհստակեցվեն ու կհրապարակվեն այս ամիսների ընթացքում՝ մինչեւ մեր Հանրապետության 21-րդ տարեդարձի օրը: Ակնհայտ է, որ ժողովրդի հաղթանակի գրավականը համապարփակ աննախադեպ ուժի ստեղծումն է՝ քաղաքացիական, քաղաքական, մտավորական, երիտասարդական ամենալայն ու ամենանվիրված հոսանքների ընդգրկմամբ՝ որպես հավաքական այդ թեկնածության համար պատասխանատվություն կրող բաժնետիրոջ եւ իրական հիմնաղբյուրի: Այս լույսի տակ արժե լրջագույնս քննել ու քննարկել Լիլիթ Գալստյանի, Անահիտ Բախշյանի, Զարուհի Փոստանջյանի, Արմեն Մարտիրոսյանի, Ալեքսանդր Արզումանյանի, Արամ Զավենի Սարգսյանի, Պարույր Հայրիկյանի, Ստեփան Դեմիրճյանի, Նիկոլ Փաշինյանի եւ էլի մի քանի շնորհալի երիտասարդների հասարակական համախմբման հնարավորությունները»:
«Առավոտ» օրաթերթ
