Դեռ մայիսի 24-ից Aravot.am կայքում անցկացվում էր հարցում, թե արդյոք ԲՀԿ-ին պաշտոններ կհատկացվե՞ն օրենսդիր եւ գործադիր իշխանության մեջ:
Քվեարկածների մեծամասնությունը՝ 41%-ը, բավական լավատես էր գտնվել, ենթադրելով, թե կոալիցիոն կառավարությանը մաս չկազմելուց հետո էլ՝ «Բարգավաճ Հայաստանի» ներկայացուցիչները կպահպանեն իրենց լծակներն իշխանության մեջ: Կանխատեսումների մեջ դարձյալ սխալվեցին նաեւ կտրուկ բացասական դիրքորոշում արտահայտածները՝ 29%-ը, որոնք ենթադրել էին, թե ոչ մի պաշտոն էլ չի հատկացվի:
Իրատես էին համեմատաբար ավելի քիչ ձայներ ստացած պատասխանն ընտրածները՝ «միայն օրենսդիրում»: Այդ տարբերակն ընտրած 14%-ը՝ ընդամենը 72 հոգին թերեւս հաշվի էին առել «ԱԺ կանոնակարգ» օրենքի պահանջը, ըստ որի էլ ԲՀԿ-ն գլխավորեց խորհրդարանական 4 հանձնաժողովները:
Կարդացեք նաև
Այսօրվանից սկսում ենք նոր հարցում, որի նպատակն է պարզել, թե արդյոք մեր հայրենակիցների տրամադրությունները համահո՞ւնչ են այն որակումներին, որոնց արժանանում է Հայաստանը միջազգային կառույցների գնահատականներում:
Եվ այսպես՝ ինչպիսի՞ երկիր է Հայաստանը, ժողովրդավարակա՞ն, մասամբ ազա՞տ, թե՞ ավտորիտար: Քվեարկությամբ հայտնեք Ձեր կարծիքը:
