Հանրային ծառայությունների, տրանսպորտի եւ առողջապահության ոլորտներին առնչվող օրենքները բարեփոխման կարիք ունեն: Հարկային ու մաքսային ոլորտներում նույնպես դեռեւս մի շարք խնդիրներ կան, որոնք կոռուպցիայի տեղ են թողնում: Օրինակ` կարեւոր խնդիր է, որ գազի եւ ջրի մատակարարումը պետության կողմից ընդհանրապես չի կարգավորվում: Այսօր ՀՀ կառավարության մամուլի կենտրոնում, ասաց «Կարգավորիչ գիլյոտին» ծրագրի ղեկավար Արմեն Եղիազարյանը:
Օրենսդրության կարգավորման ազգային կենտրոնը 2 տարվա ծրագրի գործունեության ընթացքում ուսումնասիրում է բիզնեսի եւ քաղաքացու վրա ազդեցություն ունեցող կարգավորումներ պարունակող իրավական ակտերը, նկարագրում բիզնես գործընթացները եւ համադրելով դրանք միջազգային փորձի հետ պատրաստում է իրավական ակտերի նախագծերի փաթեթ` ներկայացնելով դա բարեփոխումների խորհրդի հաստատմանը:
Ըստ պարոն Եղիազարյանի, այսօր մեր երկրում գործում են 26 հազար իրավական ակտեր, որոնք դժվարացնում են մարդկանց կյանքը: Նա վստահեցրեց, որ ծրագրի ընթացքում 30 %-ով կկրճատվի դրանց թիվը: Ներկայումս կենտրոնն աշխատում է գազի, ջրի էլեկտրաէներգիային, հաղորդակցության, տրանսպորտի եւ առողջապահության ոլորտներում բարեփոխումների ուղղությամբ:
Հարցին, թե ծրագրի ավարտից հետո որքանո՞վ կկրճատվի ստվերը մեր երկրում, Արմեն Եղիազարյանը դժվարացավ կանխատեսում անել. «Օրինակ` Խորվաթիայում 30 %-ով է կրճատվել»:
Լուսինե ԲՈՒԴԱՂՅԱՆ
