ՀՀ Քաղաքացիական ծառայության խորհրդի նախագահ Մանվել Բադալյանն այսօր լրագրողների հետ հանդիպման ժամանակ ամփոփեց ՀՀ Քաղաքացիական ծառայության խորհրդի գործունեության 2012 թվականի առաջին կիսամյակը:
«Համակարգն իր գործունեության ընթացքում նախկին տարիների համեմատ բավականին սահուն գործընթացի մեջ է մտել, ինչն էլ վկայում են մեր ունեցած ցուցանիշները, վիճակագրական տվյալները: Նշեմ, որ այս կիսամյակի ընթացքում կազմակերպվել է 366 թափուր պաշտոնների մրցույթ, որոնցից կայացել է 322-ը: 41 պաշտոնների դեպքում մրցույթների արդյունքում հաղթողներ չեն ճանաչվել: Մենք գիտենք, որ քաղաքացիական ծառայողները 3 տարին մեկ անգամ պարտադիր ատեստավորվում են, ինչի արդյունքում էլ պարզվում է՝ տվյալ քաղաքացիական ծառայողը համապատասխանո՞ւմ է իր պաշտոնին, թե՞ ոչ: Չհամապատասխանողների ցուցանիշը գնալով նվազում է: Եթե նախկինում 15-20 տոկոս էր կազմում, ապա այժմ՝ 2-3 տոկոս է. սա խոսում է մարդկանց պատասխանատվության, անհրաժեշտ գիտելիքներով օժտված լինելու մասին»,- ասաց Բադալյանը՝ հավելելով, որ մարդիկ այսօր արդեն ապավինում են միայն իրենք իրենց գիտելիքներին:
Բադալյանի խոսքով՝ էականորեն նվազել են բոլոր տեսակի միջնորդությունները, խնդրանքները եւ այլն: «Վստահեցնում եմ, եթե մարդը չունեցավ համապատասխան գիտելիքներ, հմտություններ, փորձ, ապա նրան շատ դժվար է անցկացնել պաշտոնի: Եվ այս գիծն անընդհատ պիտի զարգանա»,- հավելեց Բադալյանը:
Որպես նորամուծություն՝ Բադալյանն առանձնացրեց սոցիալական փաթեթի ներդրումը. «Կյանքը ցույց տվեց, որ սա բավականին հետաքրքիր աշխուժություն առաջ բերեց մեր քաղաքացիական ծառայողների շրջանում: Այն 52 հազար դրամով, որը պետությունը հատկացնում է յուրաքանչյուր քաղաքացիական ծառայողի համար, նրանք այժմ մինչեւ 4 մլն դրամի առողջապահական ծառայություններից կարող են օգտվել: Ու բացի բուժսպասարկումից՝ սոցիալական փաթեթով մարդիկ կարող են հոգալ նաեւ իրենց հանգստի հարցը: Հույս ունեմ՝ առաջիկա տարիներին կկարողանանք հարստացնել սոցիալական փաթեթը»:
Կարդացեք նաև
Եվա ՀԱԿՈԲՅԱՆ
