Երևանի Փոքր կենտրոնի կառուցապատումն օրենսդրորեն կանոնակարգելու նպատակով ՀՀ վարչապետի որոշմամբ ստեղծված աշխատանքային խմբում ընդգրկված «Հայաստանի երիտասարդ իրավաբանների ասոցիացիա» ՀԿ-ն նույնպես քննարկվող հիմնախնդրի վերաբերյալ ներկայացրել է առաջարկությունների փաթեթ:
Ասոցիացիայի գործադիր տնօրեն Ա. Սարիբեկյանի ստորագրությամբ վավերացրած փաստաթղթում հարց է բարձրացվում Երևանում իրականացվող կանաչապատման աշխատանքների հիմնախնդրի մասին: Նշվում է, որ այդ ուղղությամբ աշխատանքները կատարվում են թերություններով, իսկ դեռ պահպանվող կանաչ տարածքներն էլ հիմնականում «պատկանում են որոշ սեփականատերերի և ծանրաբեռնված են սրճարաններով, ապակեպատ կամ բետոնապատ անհրապույր և քաղաքի ընդհանուր տեսքին չհամապատասխանող» շինություններով:
Այս առումով հատկապես մատնանշվում են Օպերային թատրոնին, մետրոյի «Երիտասարդական» կայարանին, պետական կոնսերվատորիային հարակից հատվածները, Օղակաձև զբոսայգին և այլն: Աշխատանքային խմբի ուշադրությունը հրավիրվում է նաև մայրաքաղաքի թաղամասերում և բակերում առկա բազմաթիվ հիմնախնդիրների վրա, առաջարկում դրանց լուծման մի շարք ուղիներ:
«Բոլոր քաղաքակիրթ երկրներում գործում է այն տրամաբանությունը, որ քաղաքաշինական ծրագրեր իրականացնելիս պահպանում են իրենց պատմական հին քաղաքը: Որպես կանոն, այդ քաղաքները բաժանվում են երկու մասի՝ հին քաղաքի և նոր քաղաքի: Մեր Երևանում այդ սկզբունքը չի գործում, այլ նման է «նորացված» «հին» քաղաքի: Չկան ճարտարապետական ճիշտ և քաղաքի տրամաբանությանը համապատասխան լուծումներ»,- գրում է երիտասարդ իրավաբանների ասոցիացիայի գործադիր տնօրենը: Նա անդրադառնում է ճարտարապետական այնպիսի հուշարձանների, ինչպիսիք են «Փակ շուկան» և Հյուսիսային պողոտայում, Պուշկինի, Արամի, Բուզանդի, Աբովյան փողոցներում գտնվող մի շարք պատմամշակութային նշանակության կառույցները կամ ստորգետնյա անցումները:
Առաջարկությունների փաթեթում ներկայացվում են Երևանի Փոքր կենտրոնի քաղաքաշինական հիմնախնդիրների լուծման մի շարք տարբերակներ: Մասնավորապես առաջարկվում է Երևանի կենտրոնում առանձնացնել «Հին» Երևանը և քաղաքի կառուցապատման աշխատանքներն իրականացնել դրանից դուրս, կենտրոնում դադարեցնել բարձրահարկերի շինարարության թույլտվությունը, ապամոնտաժել քաղաքի կենտրոնում ցածրահարկ շենքերի ճակատային մասերում արված բարեկարգումները ու շենքերը բերել իրենց նախկին՝ հատակագծային տեսքին և այլն:
«Փաստինֆո» լրատվական գործակալություն
