Այս օրերին Ստեփանակերտի Ցոր զորամասի նորակոչիկները պատրաստվում են զինվորական երդման արարողությանը:
Aravot.am-ի հետ զրույցում Ցորի լեյտենանտ Հրաչ Բաղրամյանը փաստեց, որ
զորամասը մարտունակ է եւ պատրաստ է լուծել իր առջեւ դրված խնդիրները. «Դա առավելապես պայմանավորված է զինծառայողների հոգեբանական պատրաստվածությամբ: Աշխատում ենք զարգացնել նրանց հոգեբանական կարողությունները եւ բարձրացնել ֆիզիկական պատրաստվածության մակարդակը` ազգին պիտանի զինվոր տալու նպատակով»: Խոսելով նորակոչիկներից` լեյտենանտն ասաց, որ վերջիններս արդեն հարմարվում են բանակային կյանքին` հետագայում հմտանալով զինվորական ծառայության մեջ:
Ի տարբերություն քաղաքացիականի, զինվորական կյանքը զորամասում սկսվում է 6.30-ին. «Առավոտյան մարմնամարզություն ենք անում, զբաղվում մեր հիգիենայով, հետաքրքիր է հատկապես շարահրապարակում երդման արարողությանը պատրաստվելը: Մեկ ամիս էլ չկա, ինչ զինծառայող եմ, բայց արդեն հարմարվել եմ բանակի կարգուկանոն»,-ասում է նորակոչիկ Գերասիմ Երեմյանը: Երիտասարդը նշեց, որ այս ընթացքում առավել դիմացկուն է դարձել, անգամ` արեւի տակ ժամեր շարունակ զգաստ է կանգնում. «Մինչ զորակոչվելը մարտական ոգիս կարծես քնած լիներ, բայց հրամանատարիս շնորհիվ գիտակցեցի զինվոր լինելու եւ հայրենիքը պաշտպանելու պատիվը: Զորամասի պայմաններից դժգոհ չեմ, բայց, այնուամենայնիվ, Մասիվի ջրին ոչինչ չի հասնի»:
Կարդացեք նաև
Լուիզա ՍՈՒՔԻԱՍՅԱՆ
