«Որ էսքան լրագրող հետաքրքրված է, եկել է, կարող ա ես ավելի շատ ասելիք ունեմ, քան գերմանացի Ռուբենը»,-այսօր «Հայելի» ակումբում ոգեւորված ասաց արձակագիր Վահրամ Սահակյանը, որ ասուլիսի էր եկել ոչ սթափ վիճակում: Նա հայտարարեց, թե անձնագիրը պատռել-նետել է Ազգային ժողովի գլխին, որովհետեւ իրեն չի համարում այս պետության քաղաքացի:
Ինչ վերաբերում է համացանցում հայտնված իր արյունլվա նկարին, Վահրամ Սահակյանը հայտնեց, որ իրեն ոչ ոք չի ծեծել: «Ես կարո՞ղ եմ մի անգամ կատակ անել… Ոչ ֆաշիստներին եմ սիրում, ոչ Ադոլֆին, բայց Ադոլֆը մի հատ լավ խոսք ունի՝ ինչքան մեծ լինի սուտը, էնքան շատ կհավատան դրան: Ես էլ իմ ընկերուհուն խնդրեցի, ընկա գետնին, ասեցի պառկեմ, կետչուպ քսեք, նկարեք՝ դնենք սայթում, բա դրա համար արժե՞ր էսքան պատմություն»,- զարմացավ նա:
Սահակյանը ասաց, որ հոգնել է ամեն ինչից ու Հայաստանից, ուր ահասարսուռ դեպքեր են տեղի ունենում, անգամ իրեն են փորձում կաշառել, ինչի համար որոշել էր դարձյալ կատակով արյունոտ կիրակի սարքել պետական շատ դեմքերի համար:
Կարդացեք նաև
Նա նշում է, որ չի ասել, թե լավ են արել, որ մարզահագուստով «Հարսնաքար» մտնողներին ծեծել են. իրեն թվացել է ոչ թե «Հարսնաքարի», այլ ազգային անվտանգության շենք մտնելու մասին է խոսքը, որովհետեւ քնաթաթախ է եղել, երբ լրագրող է զանգել:
Իսկ պաշտոնյաներից ու օլիգարխներից ո՞ւմ արժի ծեծել: Բանախոսի կարծիքով՝ բոլորին, թեեւ ծեծելը հարցի լուծում չէ, գնդակահարելն է լուծում:
«Հարսնաքարի» հայտնի դեպքի «մասով» Վահրամ Սահակյանը նաեւ հավելեց. «Երբ Գագիկ Բեգլարյանին մարդ ծեծելուց հետո ընդառաջեցին, դրանից հետո սաղ զգացին, որ կարելի է մարդ ծեծել ու հանգիստ ապրել՝ ե՛ւ գերմանացի Ռուբենը, ե՛ւ ֆրանսիացի կամ հոլանդացի Արթուրը, մյուսները…»:
Գոհար ՀԱԿՈԲՅԱՆ
