Սպորտային արբիտրաժային դատարանը մերժել է ամերիկյան փաստաբանական գրասենյակի հայցը, որը Վրաստանի եւ Անգլիայի շախմատային ֆեդերացիաների հանձնարարությամբ բողոքարկել էր ՖԻԴԵ-ի կանոնադրությամբ նախատեսված երկու փոխնախագահների փոխարեն հինգի նշանակումը:
Դատարանի փորձագիտական հանձնաժողովը եկել է եզրակացության, որ հակառակ պնդումներին, հինգ փոխնախագահ ունենալու նախաձեռնությունը ոչ թե ՖԻԴԵ-ի նախագահի միանձնյա որոշումն է, այլ հաստատվել է այդ կազմակերպության գլխավոր ասամբլեայում: Դատարանի որոշմամբ հայցվորները ՖԻԴԵ-ին պետք է վճարեն 125 հազար շվեյցարական ֆրանկ: Սակայն շախմատի միջազգային միությունը դրանից ուրախության զգացում չի ապրում: ՖԻԴԵ-ն տարածել է մի հայտարարություն, որում ասվում է, թե «Չնայած իր համար նպաստավոր այս ելքին, ինքը խորապես ափսոսում է այդ անլուրջ բողոքարկման պատճառով վատնված միջոցների եւ ջանքերի համար»:
Աշոտ ՀԱԿՈԲՅԱՆ
