2012-ի տարեսկզբից ԱԺ Պաշտպանության, ներքին գործերի և ազգային անվտանգության հարցերի մշտական հանձնաժողովը քաղաքացիներից ստացել է պաշտպանության, մասնավորապես` զինակոչի, զինապարտության հարցերին վերաբերող ընդամենը 4-5 դիմում: Ինչպես «Փաստինֆո» գործակալության թղթակցին հայտնեցին հանձնաժողովից, լինում են նաև բանավոր դիմողներ:
Հիմնականում հարցադրումները վերաբերել են միակողմանի ծնողազուրկ կամ ընտանիքի միակ խնամող զավակին զինվորական ծառայության զորակոչելու հետ կապված հարցերին:
Նշենք, որ ԱԺ աշխատակազմի քաղաքացիների ընդունելության և նամակների բաժնում 2011 թ. քաղաքացիներից ստացված առաջարկությունների, դիմումների, բողոքների 1671 ընդհանուր թվից ընդամենը 15-ն են վերաբերել պաշտպանության հարցերին:
Մասնավորապես. առաջարկություններ են ստացվել այլ զավակ ունենալու դեպքում փաստացի միակ խնամող զավակին զինվորական ծառայության չզորակոչելու վերաբերյալ: Սահմանված կարգի խախտմամբ զինվորական ծառայության չանցած քաղաքացիների որոշ հարազատներ խնդրել են հաշվի առնել նյութական անապահով վիճակը և պատասխանատվությունից ազատել նաև առանց վճարումների: Դժգոհություններ են եղել, որ բժշկական հանձնաժողովներն արդարացի չեն որոշում զինծառայության համար պիտանիությունը: Եղել են նաև բանավոր բողոքներ, այդ թվում` բանակում մահացած զինծառայողների հարազատներից` քրեական գործերն անարդարացի քննվելու վերաբերյալ:
