Գրիգոր Մանուչարյանի շիրիմը
Նոր Վարագավանք
Տավուշի մարզի Բերդի տարածաշրջանի Վարագավան գյուղում է գտնվում Նոր Վարագավանքը, որը 1237թ. կառուցել է Հովհան ճարտարապետը ` իշխան Վասակ Բագրատունու պատվերով: Արեւմտյան Հայաստանում Վարագա վանքի ավերումից հետո այստեղ է տեղափոխվել քրիստոնական սուրբ մասունքներից մեկը՝ Քրիստոսի խաչափայտի կտորը: Այժմ այն պահվում է Սուրբ Էջմիածնում: Ամեն տարի, սեպտեմբերի վերջին կիրակի օրը, այն հանդիսավորությամբ բերվում է Նոր Վարագավանք: Հարյուրավոր ուխտավորներ են այդ օրը գալիս Վարագավան:
Վարագավանի հին գյուղատեղիում է գտնվում վարդապետ Գրիգոր Մանուչարյանի գերեզմանը: Գ. Մանուչարյանը 1826-28 թթ.. ռուս-պարսկական պատերազմի ժամանակ գլխավորել է 500 հեծյալներից բաղկացած քաջարի ջոկատ: Ի պատիվ Գրիգոր Մանուչարյանի` ցարական կառավարությունը մի որոշ ժամանակ Շամշադինի տարածաշրջանն ազատել է հարկերից: Քաջ վարդապետի անշուք գերեզմանը գտնվում է Հախում գետի աջ ափին` գյուղից մոտ 5 կմ հեռավորությամբ՝ հին, ավերված մատուռի հարեւանությամբ: Նոր Վարագա վանքը, կիսավեր մատուռը եւ հերոս վարդապետի գերեզմանը նորոգման կարիք ունեն, սակայն Վարագավան համայնքի 7 միլիոն դրամ բյուջեում ազատ միջոցներ չկան:
«Վարդապետ Մանուչարյանի գերեզմանը կառուցապատելու համար հազար տեղ եմ դիմել, սակայն աջակցություն չկա: Նոր Վարագա վանքի գմբեթից անձրեւները ներս են թափանցում, պատերին ճեղքեր կան: Հովանավորի միջոցներով այս տարվա աշնանը վանքի մասնակի նորոգում կարվի»,-ասաց Վարագավանի գյուղապետ Սամվել Մանուչարյանը: Նշենք, որ 2009-2011թթ.. պետբյուջեի միջոցներով կառուցապատվել է վանք տանող 4,8 կմ ճանապարհը:
Ոսկան ՍԱՐԳՍՅԱՆ
Կարդացեք նաև
