Ժորա Աթոյանը
Ինչպես տեղեկացրել ենք, այսօր մահացավ ՀԱԿ ակտիվիստ, գյումրեցի ազատամարտիկ Ժորա Աթոյանը, որին մեկ տարի շարունակ դատում էին իբրև թե հիվանդության կեղծ փաստաթղթեր սարքելու, զինվորական կենսաթոշակ ու բնակարան ձեռք բերելու համար:
Բազմաթիվ հիվանդություններով տառապող 55-ամյա ազատամարտիկը փաստորեն չդիմացավ այս մեղադրանքներին: Այսօր նրա մարտական ընկերները մեզ փոխանցեցին, որ քննիչը կալանք էր դրել ոչ միայն Ժորա Աթոյանի թոշակի, այլև պետականորեն հասանելիք բուժօգնության ու դեղորայքի վրա: «Ժորայի` մարտի դաշտում վիրավորվելը, կոնտուզիա ստանալը շատ լուրջ հետևանք էր թողել նրա առողջության վրա, և պարբերաբար բուժվում էր: Քանի որ նա զինվորական երկրորդ կարգի հաշմանդամ էր, իր հասանելիք բուժումը, դեղորայքը ձրի էր, այսինքն` ֆինանսական հնարավորություն չուներ բուժվելու, արտոնությունից էր օգտվում: Երբ որ էս շինծու մեղադրանքը Ժորայի վրա ստեղծեցին, քննիչը կալանք դրեց նրա բոլոր արտոնությունների վրա` սկսած թոշակից վերջացրած դեղորայքով: Ժորան այդ ամբողջ մեկ տարվա ընթացքում ծանր հոգեվիճակ ունենալուց բացի, հնարավորություն չուներ դեղեր գնելու: Ժորա Աթոյանի մահը իշխանությունների կողմից կատարված սպանություն է, ու թող էն դատող դատավորն ու Հարությունյան Հարություն կոչվող դատախազը Աստծո դեմ պատասխան տան Ժորայի համար, նրա մահը իրենց վիզն է»,- ասաց նրա ընկերներից մեկը` Գևորգ Ալիխանյանը:
Ըստ ընկերների` ազատամարտիկը մահացել է աղքատության մեջ, նա անգամ տուն չունի, նրա կինը ևս ծանր հիվանդ է, որի առողջական վիճակը էլ ավելի վատացել է ամուսնու դատավարության ընթացքում: «Պատկերացրեք այս ընտանիքի վիճակը, մի կողմից սոցիալական, մուս կողմից բարոյահոգեբանական վիճակը` իբրև թե Ժորան ազատամարտիկ չի եղել, խաբել է, մարդու անցյալը ուղղակիորեն փորձեցին պղծել, ու մարդը չդիմացավ:Մեր ընկերներից, ովքեր առավոտյան Ժորայի կողքն են եղել, պատմում էին, երբ որ շտապօգնությունը փորձել է բարձիկ դնել նրան թթվածին տալու, նա ձեռքով հրել, մի կող է գցել ու ասել է` այլևս պետք չէ, ուշ է, շատ ուշ:Այսինքն մարդուն սպանեցին խոսքով ու ազգադավ քաղաքականությամբ, անպարկեշտ մարդը չգիտի, թե պարկեշտությունն ինչ է:Երբ որ ազատամարտիկները կռվում էին Արցախի համար, այդ ժամանակ նույն իշխանությունները օսլայած օձիքներով ման էին գալիս արտասահմաններում, արյունը մենք ենք թափել, ու թող չփորձեն ազատամարտիկներին տեռորի ենթարկել», -բորբոքվեց ազատամարտիկ Գևորգ Ալիխանյանը:
Նունե ԱՐԵՎՇԱՏՅԱՆ
Կարդացեք նաև
