Հայաստանի անկախանալուց հետո Տավուշի մարզի սահմանամերձ գյուղերից արտագաղթ սկսվեց: Սահմանամերձ մյուս գյուղերի համեմատ՝ Բերդի տարածաշրջանի Մովսես գյուղից արտագաղթն ավելի մեծ չափով է եղել: Մովսեսցիները հիմնականում վերաբնակվել են Մոսկվայում: Մոսկվայի դպրոցներում դասարաններ կան, որոնց աշակերտների մեծ մասը սերում է Մովսեսից: Մովսեսում թաղամաս կա, որտեղ ամեն տնից Մոսկվա վերաբնակվողներ կան, այդ պատճառով այն անվանում են «մոսկվիչների թաղամաս»:
Խորհրդային շրջանում Մովսեսի դպրոցն ուներ շուրջ 1000, հիմա 7 անգամ պակաս՝ 167 աշակերտ: Մոսկվաբնակ մովսեսցիներից շատերն օգնում են գյուղում մնացած հարազատներին, իրենց ծննդավայրին: 2011թ. օգոստոսի 7-ին Մովսեսում տեղի ունեցավ մոսկվաբնակ մովսեսցի, գործարար Վազգեն Վանեսյանի եւ իր ընկերների ֆինանսավորմամբ կառուցված Սուրբ Աստվածածին եկեղեցու օծումը: Նույն Վազգեն Վանեսյանը երկու հատ «ՈՒԱԶ» ավտոմեքենա է նվիրել սահմանապահներին:
Նա նաեւ ծննդավայրին հրշեջ մեքենա է նվիրել, որը այժմ կայանած է Մովսեսում: Գյուղապետ Լյուդվիգ Ապերյանն ասաց, որ Վազգեն Վանեսյանը գյուղից երկու աշխատողի վարձատրում է, որոնք հրշեջ մեքենայի մոտ հերթապահում են: Առայժմ Մովսեսում հրդեհներ չեն եղել, մեքենան գործարկելու կարիք չի եղել:
ՈՍԿԱՆ ՍԱՐԳՍՅԱՆ
Կարդացեք նաև
«Առավոտ» օրաթերթ
