Հուլիսի 3-ից Գեղարվեստի ակադեմիայում մեկնարկել են քննությունները, հանձնաժողովն էլ նախագահում է ՀՀ Պետական եւ
Նախագահի մրցանակի դափնեկիր, անվանի քանդակագործ Գետիկ Բաղդասարյանը:
Aravot.am- ը նրանից կարծիք հարցրեց Գեղարվեստի ակադեմիայի այս տարվա դիմորդների վերաբերյալ: Վարպետը, պարզվում է, հիացած չէ. «Ճիշտն ասած, առանձնապես աչքի չեն ընկնում, գծանկարից թույլ են, քանդակ համեմատաբար լավ են անում, երեւի ավելի պատրաստված են, իսկ ընդհանուր առմամբ որակը թույլ է»: Թե ինչո՞ւ՝ այդ հարցը արվեստագետին էլ է հետաքրքրում, ասում է՝ գուցե իրենց պահանջներն են ավելի խիստ: Ամեն դեպքում հույսը չի կորցնում՝ մեկ-երկուսից շնորհալի քանդակագործ ու նկարիչ դուրս կգա: Aravot.am-ի հետ զրույցում արվեստագետը ցավով փաստում է. «Մենք քանդակագործներ ենք պատրաստում, բայց սպառողական պահանջարկ չկա, ինքներս աշխատանք չունենք, իրենց էլ պատրաստում ենք՝ իբրեւ ավելորդ բեռ, չգիտենք, թե ինչ է լինելու»: Նրա խոսքով, այսօր մեր լավագույն քանդակագործների մեծ մասը պարապ է, եւ պատվերներ չկան:
«Օրերս Հայաստանի ժողովրդական նկարիչ Ղուկաս Չուբարյանի հուշատախտակը բացվեց, հրաշալի քանդակագործ է, ափսոսում եմ, որ նրա ամբողջ պոտենցիալը չի օգտագործվել: Դա նույնն է, որ հարուստ լինես, բայց էդ հարստությունը չկարողանաս օգտագործել: Հասկանալի է՝ սոցիալական պատճառներով է, բայց էդպես մի տեսակ ամեն ինչ ասես բնականոն հունից դուրս եկած լինի»,- կարծում է արվեստագետը:
Կարդացեք նաև
Գոհար ՀԱԿՈԲՅԱՆ
