ՀՀ Սահմանադրության 17-րդ տարեդարձի օրը Ազգային ինքնորոշում միավորման նախագահ Պարույր Հայրիկյանը հայազգի բոլոր ներկայացուցիչներին պատվիրում է անգիր անել մեր հիմներգի հետեւյալ տողերը.
«Ամենայն տեղ մահը մին է.
Մարդ մեկ անգամ պիտ մեռնի,
Բայց երանի որ յուր ազգի
Կարդացեք նաև
Ազատության կզոհվի… » եւ դրանով ապրել, եթե ուզում ենք ապագա ունենալ:
Aravot.am-ի հետ զրույցում Պարույր Հայրիկյանը բոլոր հայորդիներին պատգամեց նաեւ չմոռանալ եւ չուրանալ ծնողներին ու հայրենիքը՝ անկախ Հայաստանի իշխանությունների կեցվածքից: Սահմանադրության գոյության 17 տարիների ընթացքում Հայրիկյանին մեկ անգամ բախտ վիճակվել է կազմակերպիչը եւ մասնակիցը լինել սահմանադրական փոփոխությունների: Սակայն նա գտնում է, որ ՀՀ սահմանադրությունը մեկ անգամ եւս պետք է բարեփոխվի: Իբրեւ առաջնային խնդիր՝ Հայրիկյանը մատնանշում է այն, որ Սահմանադրության մեջ պետք է ներառել ներկայացուցչական մարմինների գործունեության կարգը կամ գոնե սկզբունքները: «Փոփոխություն անպայման պետք է կատարվի, դրա համար էլ ես մասնակցելու եմ նախագահական ընտրություններին»,- ասաց Հայրիկյանը, հավելելով, որ ՀՀ նախագահ դառնալու իր նպատակը սահմանադրական բարեփոխում կատարելն է եւ դրան զուգահեռ՝ նախագահի պաշտոնի վերացումը, վարչապետի եւ փոխվարչապետի լիազորությունների ավելացումն ու հստակեցումն է: Իսկ անցած սահմանադրական բարեփոխումները Հայրիկյանը դրական է գնահատում, քանի որ դրանով, ըստ իրեն, Հայաստանը միապետությունից վերածվեց խորհրդարանական պետության: Ընդհանրապես, Հայրիկյանի համոզմամբ, Սահմանադրությունը ազգային պետության հիմքերի հիմքն է, ազգային արժեքային համակարգի ուղեցույցը եւ եթե այն իր նպատակին չի ծառայում, ուրեմն խաթարվում է պետության գոյությունն ու գործունեությունը:
Նելլի ԳՐԻԳՈՐՅԱՆ
