Այսօր Հայաստանի պետական ագրարային համալսարանում կայացավ Ուսանողական 13-րդ գիտաժողովի ամփոփիչ նստաշրջանում մրցանակային տեղեր զբաղեցրած ուսանողների պարգեւտրման արարողությունը: Գիտական համաժողովին ընդհանուր մասնակցել է 400 ուսանող, սակայն մրցանակային տեղեր զբաղեցրել են 30-ը:
Համալսարանի ուսանողական խորհրդի նախագահ Հայկ Ղեւոնդյանը մեզ հետ զրույցում ներկայացրեց կարգը, որով ընտրվել են հաղթող մասնակիցները. «Գիտաժողովը մենք սկսում ենք սեպտեմբեր ամսից ու այն տեւում է մինչեւ մայիս ամիս: Այդ ընթացքում մեր ուսանողները կազմում են զեկույցներ, ղեկավարների հետ միասին աշխատում են դրանց վրա ու հանձնում են ամբիոնային փուլ: Ամբիոնում լսում են, անհրաժեշտության դեպքում կոչ անում` կատարել փոփոխություններ, դրանից հետո երաշխավորվում են տվյալ զեկույցները ու անցնում են ֆակուլտետային փուլ: Այնտեղ լսում են արդեն փոփոխություններ կատարած զեկույցները: Այդ փուլում հանձնաժողովը որոշում է` ո’րն է ռեֆերատային զեկույց, ո’րը գիտական: Գիտական բնույթի զեկույցները ուղարկվում են համալսարանական նստաշրջանին, որտեղ ուսանողները յոթ բաժանմունքներում ներկայանում են համալսարանի կողմից: Դրանից հետո հանձնաժողովը, մի շարք կառույցների հետ միասին, անցկացնում է քննարկում, այսինքն` ո’ր զեկույցները լավ ներկայացվեցին, որո’նք էին իրոք լավը ու ո’րը կարելի է երաշխավորել: Մրցանակային տեղեր զբաղեցրած զեկույցները լույս կտեսնեն համապատասխան ամսագրերում, որը կհամարվի ուսանողի կողմից գրված գիտական հոդված»:
ՈւԽ նախագահի խոսքով սա խթան է, որպեսզի երիտասարդությունը զբաղվի գիտությամբ: Ասում է, ընտրող հանձնաժողովի աշխատանքը նույնպես դժվար է եղել, քանի-որ ընտրությունը եղել է շատ բարդ. « Գրված են եղել շատ լավ, ու ներկայացված զեկույցները կարելի է որակավորել բարձր թեկնածուի աշխատանքներ»:
Ագրարային համալսարանի գիտական խորհրդի քարտուղար Սոնա Ինկվիզյանը պարգեւատրվողների շարքում էր: Իր զեկույցի թեման` կենսաթոշակային բարեփոխումների ծրագիրն էր: Ասում է` մեկ տարի աշխատել է դրա վրա. «Այս թեման արդիական է, դրա համար էլ որոշեցի զեկույցս այդ թեմայով գրել»:
Արամ ԱՐԱՐԱՏՅԱՆ
