«Ընտրությունները ոչ ազատ էին, ոչ արդար էին: Բոլոր այն մխիթարական խոսքերը, որ ասում է ՀՀԿ-ն, չգիտեմ ում ուշադրությունն են ուզում շեղել, բայց հասարակությունը հաստատ համոզված է, որ ընտրությունները չեն եղել օրինական ձեւով»,- այսօր խորհրդարանական ընտրությունների թեմայով «Սիվիլիթաս» հիմնադրամի կազմակերպած հանրային բանավեճի ժամանակ հայտարարեց «Ժառանգության» նախկին պատգամավոր Անահիտ Բախշյանը:
«ԳԱԼԱ» հեռուստաընկերության տնօրեն Կարինե Հարությունյանը վստահեցրեց, որ Գյումրիում ընտրակաշառքը սկսել է տարիներ առաջ 3000 դրամից ու հիմա հասել մինչեւ 10-15 հազարի. «Գործող նախագահի նկարը ընտրություններին ընտրատեղամասի պատին կախված է, ծիծաղում են, ասում են՝ մեր նախագահն է: Վստահված անձինք խորոված-խաշլամաները կերել են, արդեն թե ով պարկի մեջ ինչքան քվեաթերթիկ է գցել՝ ո՞վ է տեսել»:
«Իրավունքի Եվրոպա» միավորման տնօրեն Լուսինե Հակոբյանը այս առնչությամբ նշեց, որ վստահված անձինք համապատասխան գիտելիքներ չունեն, երբեմն չեն հասկանում, թե ինչն է ընտրախախտում: Նա նաեւ պատմեց, որ մի վստահված անձ ականատես է եղել, թե ինչպես են բաժանվել ֆլոմաստերներ տարբեր գույների ու ուղղորդել ակնհայտորեն. «Վստահված անձը չէր կարողանում ընկալել, որ դա նույնպես ընտրախախտում է եւ ընտրությունների գործընթացը վերահսկելու քայլ»:
Անդրադառնալով Ռուբեն Հայրապետյանի՝ մանդատը վայր դնելու հարցին, թե չի՞ կարելի խնդրել, որ նրան միանան մյուս բիզնեսմենները՝ տիկին Բախշյանը պատասխանեց. «Եկեք շարժում ստեղծենք: Հիմա ֆեյսբուքում պահանջ կա՝ ազատել ԱԺ-ն այլ օլիգարխներից, բայց ինչպես տեսնում եք, այդ բոլոր քայլերը նախագահականում են սկսվում եւ ավարտվում: Դպրոցում դրամահավաքի համար ասում են, որ եթե տնօրենը չուզենա՝ չի լինի: Հիմա ես դա ընդհանրացնում եմ ու ասում եմ՝ եթե նախագահը չուզենա՝ չի լինի: Ո՞նց անենք, որ համոզենք, որ չուզենալու նախաքայլը ինքը՝ նախագահը անի, կամ գոնե ինքը իր ասածին հավատա ու մեզ հավատացնի, որովհետեւ ընտրություններից առաջ ասում էր, որ տարանջատվելու են քաղաքականությունն ու բիզնեսը, բայց չեղավ: Ռուբեն Հայրապետյանի տարանջատումը կարող էր լինել ժամանակին»: Տիկին Բախշյանը հիշեց, որ տնօրենների հավաստագրման ժամանակ տնօրենները իրարից կուսակցական նշան են խնդրել՝ քննության գնալու համար, եւ հորդորեց, որ այդ կուսակցական նշանների «մաֆիան» դադարեցվի:
Կարդացեք նաև
Հռիփսիմե ՋԵԲԵՋՅԱՆ
